Elçin Cəfərov Azərbaycanda istirahət etməkdən qorxur

Xalq artisti Brilliant Dadaşova yenidən konsert verəcək. Sənətçi repertuarında dəyişikliyə əl atdığını açıqlayıb: “Hazırda bağ evimdə konsert üçün yeni mahnılar hazırlayırıq,..

     Xalq artisti Brilliant Dadaşova yenidən konsert verəcək. Sənətçi repertuarında dəyişikliyə əl atdığını açıqlayıb: “Hazırda bağ evimdə konsert üçün yeni mahnılar hazırlayırıq, məşqlər edirik. Bu, sırf yay konserti olacaq. Ona görə də fərqli, daha şən mahnılar hazırlayıram. Konsertin vaxtı hələ ki, dəqiqləşməyib, amma maraqlı alınacağına inanıram. Repertuarıma köhnə bəstələrlə yanaşı, yeni mahnılar da daxil edirəm”.

     Əməkdar artist Ədalət Şükürov konsert verəcək.  Müğənni açıqlamasında tədbirin Dağıstanda reallaşacağını deyib: “Dağıstanda iki konsert verəcəyəm.Tədbir  əyləncə mərkəzlərinin birində gerçəkləşəcək. Təklif onlardan gəlib. Hələ ki, Bakıda konsert haqda düşünmürəm”.

     Bir neçə gündür ki, şəhərimizin qonağı olan rusiyalı müğənni Alsu ad gününü təmtəraqlı şəkildə qeyd edib.  Şəhərkənarı otellərdən birində gerçəkləşən mərasimdə əyləncəli anlar yaşanıb. Şoumen Murad Dadaşovun hədiyyəsi rusiyalı qonaqları təəccübləndirib. Belə ki, Murad xalq artisti İlhamə Quliyevanın oğlunun toyunda hədiyyə etdiyi tortun eynisindən 30 yaşını qeyd edən Alsu üçün də hazırlatdırıb. Alsu doğum günündə ona edilən sürprizlərə heyran qalıb. Gecənin sonunda müğənni üçün atəşfəşanlıq da edilib. Qeyd edək ki, Alsu Bakıya yeni klipinin çəkilişi ilə bağlı gəlib.

      Müğənni Elçin Cəfərov yay mövsümündə Azərbaycanda istirahət etməkdən qorxur. O, açıqlamasında çimərlik fotolarının xəbər portallarında yayılmasından ehtiyat etdiyini bildirib. Bu səbəbdən müğənni dincəlmək üçün xarici ölkələri seçir. “Şortikdə şəkil ola bilər. Amma çimərlik geyimində fotomun yayılmasını heç vaxt istəməmişəm. İndiyədək heç bir media orqanında çimərlik şəklim olmayıb. Azərbaycanda istirahəti çox sevirəm. Amma fotolarımın çəkilməsindən ehtiyat etdiyim üçün heç vaxt burada dincəlmirəm. Elə bu il də Türkiyəyə, ya da Gürcüstana gedəcəyəm. Düşünürəm ki, müğənni çox yerdə görsənməməlidir. Hardasa olanda tanınırsan, yaxınlaşmaq istəyirlər. Bu da məni çox sıxır” – deyə sənətçi bildirib. Yeniliklərindən də danışan Elçin bu yaxınlarda “Sev məni” adlı mahnısına klip çəkdirəcəyini bildirib.

 

 

Sahilə Aslanova

 

Muz-Tv.az