Müslüm Maqomayevin yubileyidir

Görkəmli sənətkar, SSRİ-nin Xalq artisti Müslüm Maqomayevin anadan olmasından 70 il ötür.  

    Görkəmli sənətkar, SSRİ-nin Xalq artisti Müslüm Maqomayevin anadan olmasından 70 il ötür. O, 1942-ci ildə Bakıda sənətkar ailəsində doğulub. Hələ altıncı sinifdə oxuyarkən ilk mahnısını bəstələyən azyaşlı Müslüm mahnını ilk sevgilisinə - Marina adlı qıza həsr edir. Müğənni “Bahar guşəsi Azərbaycan” (“Весенний край-Азербайджан”, “Əlvida Bakı” (“Прощай, Баку!”), “Qısqanc Qafqaz” ( “Ревнивый кавказ”), “Həmin pəncərədə” (“У того окна”), “Elegiya” ( ”Элегия”), “Qar şahzadəsi” ( “Принцесса снежная”), “Axan ulduzların laylası” (“Колыбельная падающих звезд”), “Kədər” (“Грусть”) kimi mahnılarla ölkəsini təmsil edərək peşəkar karyerasında günbəgün yüksəlir. İlk dəfə 14 yaşında dənizçilər klubunda iştirak edən Müslüm daha sonralar Fransa, Bolqarıstan, Polşa, Finlandiya, Kanada, İran və digər ölkələrdə konsert proqramları ilə çıxış edir.
    19 yaşında Helsinkidə gənclər festivalında, 1963-cü ildə Moskvada keçirilən Azərbaycan mədəniyyəti günlərində uğurlu çıxışları ilə şöhrət qazanmağa başlayır.
    Qeyri-adi uğurlara imza atan Müslüm Maqomayevin həyat və sənət yolu da qeyri-adi olur. Özünü kinoda həm bəstəkar, həm aktyor, həm də sözsüz ki, ifaçı kimi sınayır. O,"Seviliya bərbəri" operasında möhtəşəm çıxışı ilə milyonlarla tamaşaçının rəğbətini qazanır. Bununla yanaşı, “Nizami” filmində baş rolda çəkilir, kinorejissor Eldar Quliyevin filminə, Qleb Drozdovun tamaşasına musiqi bəstələyir.
    İkinci dəfə opera müğənnisi Tamara Sinyavskaya ilə ailə quran Müslüm Maqomayev sadiq həyat yoldaşı ilə ömrünün sonuna kimi xoşbəxt yaşayır. 2008-ci il, oktyabrın 25-də 67 yaşında Moskvada vəfat edən sənətkar öz doğma şəhəri Bakıda I Fəxri xiyabanda dəfn edilir.

 

Aysər Həsənli

 

Muz-Tv.az