Demet Akalın zəhərləndi

Türkiyəli aktrisa Sədəf Avcı tezliklə ana olacaq. 5 aylıq hamilə olan ulduz məşhur istirahət mərkəzlərindən birində çimərlik geyimində görülüb. 

  Türkiyəli aktrisa Sədəf Avcı tezliklə ana olacaq. 5 aylıq hamilə olan ulduz məşhur istirahət mərkəzlərindən birində çimərlik geyimində görülüb. Gözəl xanımın çimmək əvəzinə kölgədə oturmağa üstünlük verdiyi diqqətdən yayınmayıb. Sədəfin özü kimi aktyor olan həyat yoldaşı Kıvanç Kasabalı onun hər istəyini reallaşdırmağa çalışıb.

  Cennifer Lopezin keçmiş həyat yoldaşı Mark Entoni bir müddətdir məşhur iş adamı Filip Qrinin qızı Xloye ilə birlikdədir. Cütlük Qrinin “Sent Trope” çimərliyində saxladığı yaxtında kameralara tuş gəlib.  Sevgililər çəkildiklərini görsələr də, buna fikir verməyiblər. Xloyenin anası Tina da yaxtda olub. Xatırladaq ki, Markın 44, sevgilisinin isə 22 yaşı var.

  İstanbul Caz Festivalı çərçivəsində möhtəşəm konsert reallaşıb. Mətbuat işçilərinin içəri buraxılmadığı tədbiri Nil Karaibrahimgil, Kənan Doğulu və Beren Saat kimi məşhurlar izləməyə gəlib. Kənan və Beren cütlüyü uzun müddətdən sonra ictimaiyyət arasında görülüb. Konsertdən sonra avtomobillərini gözləyən məşhur sevgililər onlara yönləndirilən sualları cavabsız qoyublar. Beren Saat yalnız gecə boyunca Kənanla bol-bol rəqs etdiklərini söyləyib.

  Məşhur “Alatoranlıq” silsilə filmlərinin ulduzu Kristen Stüart Parisdə moda həftəsində iştirak edib. Aktrisa tədbirdən sonra otelə qayıdarkən görülüb. Kristenin çox xoşbəxt olduğu diqqətdən yayınmayıb. Aktrisanın niyə bu qədər sevindiyi isə məlum deyil. Ulduz sadə gözəlliyi ilə nəzərləri üzərinə toplayıb.

  Müğənni Demet Akalın gecə klublarından birində verdiyi konsertdən əvvəl jurnalistlərə qidadan zəhərləndiyini söyləyib. Ulduza kökəldiyini xatırlatdıqda isə ciddi pəhriz rejiminə riayət etdiyini bildirib. Daha sonra səhnəyə çıxan Akalın onu izləməyə gələn 2 min insana unudulmaz anlar yaşadıb.

  Məşhur ulduz Qotye əvvəllər solisti olduğu “The Basics” qrupuna geri dönərək yeni trek yazdırıb. Avstraliyalı ifaçı musiqiçiləri ilə birlikdə “So hard for you” sinqlını təqdim edib. Kompozisiyaya artıq klip də çəkilib. Xatırladaq ki, kollektivdən keçən il ayrılan Qotye “Somebody that i used to know” mahnısı ilə bütün dünyada məşhurlaşıb.

  Hollivud ulduzu Hyu Cekman “Forbes” jurnalının keçirdiyi sorğuya əsasən ən varlı aktyor elan edilib. Nəticələr məşhurların layihələrdə iştirakı və şəxsi uğurlarına görə əldə etdikləri gəlirlərə görə müəyyənləşdirilib. Hyu Cekmanla birlikdə siyahıda Robert Dauni, Leonardo DiKaprio və Tom Kruz da yer alıb. Ancelina Coli 11-ci yerlə kifayətlənməli olub. Qeyd edək ki, kofe və çay istehsalı ilə məşğul olan Cekman əldə etdiyi gəliri xeyriyyə işlərinə xərcləyir.  

 

Sahilə Aslanova

 

Muz-Tv.az