Emin Ağalarovdan möhtəşəm motosiklet şousu

Emin Ağalarov Bakıda növbəti dəfə konsert verib. Yaşıl Teatrda təşkil edilən tədbirdən öncə ifaçının fanatları  məkanın önündə öz ulduzlarına sevgilərini nümayiş etdiriblər. 

    Emin Ağalarov Bakıda növbəti dəfə konsert verib. Yaşıl Teatrda təşkil edilən tədbirdən öncə ifaçının fanatları  məkanın önündə öz ulduzlarına sevgilərini nümayiş etdiriblər. Bütün oturacaqlara bağlanmış qırmızı şarlar isə məkanı bir anlıq lalə düzünə bənzədib. Emini dinləməyə gələnlər arasında onun atası, azərbaycanlı iş adamı Araz Ağalarov da olub. Gurultulu alqışlarla səhnəyə təşrif buyuran Emin  “Never enough” mahnısı ilə zalı daha da çoşdurub.

    Və ifaçının təklifi ilə, onu sevənlər öz oturacaqlarına bağlanmış şarları havaya uçurub. Vaxtaşırı Emin səhnədəki royalın arxasına keçərək ifasına daha da canlılıq qatıb. Məşhur ulduz hər zaman olduğu kimi bu dəfə də tamaşçılarının qarşısına maraqlı sürprizlərlə çıxıb. “Angel Bes” mahnısını səsləndirən Emini səhnədə ağ və qara mələk obrazlarını canlandıran iki rəqqasə xanım müşayiət edib. Onların mələklərin mübarizəsini əks etdirən şousu gələn qonaqlarda xoş ab-hava yaradıb.

    Hər konsertində  olduğu kimi Emin bu dəfə də kumiri və müəllimi hesab etdiyi SSRİ Xalq artisti Müslüm Maqomayevi yad edib. Daha sonra Emin yenidən royal arxasına keçərək sənətkarın repertuarından olan “More” mahnısını oxuyub. Konsertdə həmçinin bu il Azərbaycanı “Avroviziya” mahnı müsabiqəsində təmsil edən Fərid Məmmədov da çıxış edib. Daha sonra motosikletlə səhnəyə qayıdan ifaçı tamaşaçılara əsl həyəcan yaşadıb.

    Sonuncu mahnılarını ifa edərkən zalı daha da ruhlandıran Emin bütün sevənlərini səhnənin önünə dəvət edib. Konsertdən sonra jurnalistlərə müsahibə verən Emin gecədən çox məmnun qaldığını söyləyib.

    Qeyd edək ki, iyulun 13-də Emin onu sevənlərini yenidən konsertlə sevindirəcək.

 

Sərvər Mehdiyev

Ramal Gülməmmədov

 

Muz-Tv.az