Dünyaşöhrətli ulduz bu həftəsonu ailə həyatı quracaq

46 yaşlı aktrisa Holli Berri toyunun tarixini açıqlayıb. Məlumata görə, tezliklə ana olmağa hazırlaşan ulduz bu həftəsonu ailə həyatı quracaq. 

   46 yaşlı aktrisa Holli Berri toyunun tarixini açıqlayıb. Məlumata görə, tezliklə ana olmağa hazırlaşan ulduz bu həftəsonu ailə həyatı quracaq. “Oskar” mükafatı laureatı olan Berri 47 yaşlı sevgilisi, fransız aktyor Olivye Martineslə evlənəcək. Cütlük Paris rayonlarından birində yerləşən kiçik kilsədə bir-birlərinə əbədi sədaqət sözü verəcəklər. Məşhurların yaxınlarının sözlərinə görə, Olivye Los Ancelesi sevmir və yalnız Hollinin xətrinə orada yaşamağa razılıq verib. Toy mərasimindən sonra cütlük Fransada yaşayacaq.

   Dünyaşöhrətli müğənni Britni Spirs “Oh la la” adlı mahnısına çəkdirdiyi yeni klipini sevənlərinə təqdim edib. Trek “Smurflar” cizgi filminin saundtrekidir. Video çarxda ulduzlar birlikdə övladları Ceyden və Şon Preston da rol alıb. Kompozisiyanın müəllifi əfsanəvi Dr. Lyukdur. Saundtrek cizgi filminin dünya premyerasından sonra satışa çıxarılacaq.

   Mərhum müğənni Uitni Hyustonun qızı Bobbi Kristina Braun şəxsi “Facebook” profilində Nik Qordonla nişanlandığını elan edib. Xatırladaq ki, Nik Uitninin himayəsində böyüyüb. Mərhum ulduz onu 12 yaşında oğulluğa götürüb. Elə buna görə də Bobbi Kristina Nikin onun bioloji qardaşı olmadığını hər kəsə xatırladıb. “Bəli, mən və Nik nişanlanmışıq. Biz bacı- qardaş deyilik. Anam heç vaxt onu rəsmi oğulluğa götürməyib. O, bizim münasibətlərimizdən xəbərdar idi” – deyə gənc xanım qeyd edib.

   Rusiyalı müğənni Qriqoriy Leps avqustda nəzərdə tutulan turnesini təxirə salıb. Buna səbəb həkimlərin sənətçinin oxumasına qadağa qoyması olub. Müğənninin rəsmi saytında Lepsin səs tellərində problemlərin olduğu bildirilib. Buna baxmayaraq, ulduz sentyabrda planlaşdırdığı bəzi konsertləri reallaşdıracaq. Onlar arasında Qriqoriy Lepsin doğum gününə həsr olunan tədbir də var.

 

Sahilə Aslanova

 

Muz-Tv.az