Şəfiqə Axundova ilə vida mərasimi

Həyatı çox sevdiyi üçün “Həyat sən nə şirinsən”, umu-küsü sevmədiyi üçün “Mehriban olaq”, tək övladı üçün “Gözümün nuru”, ayrılığı sevmədiyi üçün “Bu ayrılıq nədən oldu”...

   Həyatı çox sevdiyi üçün “Həyat sən nə şirinsən”, umu-küsü sevmədiyi üçün “Mehriban olaq”, tək övladı üçün “Gözümün nuru”, ayrılığı sevmədiyi üçün “Bu ayrılıq nədən oldu” mahnılarını nota çevirən xalq artisti Şəfiqə Axundova aramızdan ayrılıb. Uzun müddətdir səhhətində problemlər yaşayan və bir neçə həftə əvvəl Bakıya müalicəyə gətirilən Şərqin opera yazan ilk qadın bəstəkarı iyulun 26 da sənət dostlarına, ailəsinə, ürək verdiyi mahnılarına və ən əsası bu dünyaya əlvida deyib əbədiyyata qovuşub.

   Hər kəs bu dəfə onun gülər üzünü görmək, ürək verdiyi mahnılarını dinləmək üçün yox,  böyük sənətkları son mənzilinə yola salmaq üçün toplaşıb.

Şəfiqə xanımın ölümü hər kəsdə təəssüf hissi doğursa da,  sənətkarın bacısı Rəfiqə Axundova onu itirdiyi üçün daha böyük kədər içində olub.

   Bəstəkarın yaxınları, sevənləri, eləcə də sənət dostları həyatdan köçən, Azərbaycanının əvəzedilməz sənətkarı Şəfiqə Axundovanın vida mərasimində iştirak edib. 

Daha sonra səhnədə bir -bir yerini alan incəsənət xadimləri sənətkar haqqında xatirələrini bölüşüblər. Xalq artisti son mənzilə Rəşid Behbudov adına Dövlət Mahnı Teatrından öz bəstəsi olan “Həyat sən nə şirinsən” mahnısının sədaları altında yola salınıb və teatr səhnəsindən böyük alqışlarla II Fəxri Xiyabana aparılıb.

   Qeyd edək ki, sənətkar 1924-cü ildə Şəki şəhərində anadan olub. 

 

Səma Ələsgərova

Elfaq Lələyev

 

Muz-Tv.az