Nadir Qafarzadə: ““Maral”a çatan ifa yoxdur”

Əməkdar artist Azərin bu dəfə də Türkiyənin Kastamonu şəhərində möhtəşəm konsert proqramı ilə çıxış edib. 

    Əməkdar artist Azərin bu dəfə də Türkiyənin Kastamonu şəhərində möhtəşəm konsert proqramı ilə çıxış edib. Sənətçi bu mərasimdə də  iki qardaş ölkənin bayrağını bir arada dalğalandırıb. Türkiyənin bir çox dövlət tədbirlərində Azərbaycan mədəniyyətini, musiqisini təbliğ edən Azərin bu dəfəki ifası ilə də türkləri heyrətləndirə bilib. Mindən artıq tamaşaçının toplaşdığı konsert salonunda Azərbaycanın klassik əsərləri, türk bəstələri, xalq musiqiləri səslənib. Azərbaycan müğənnisinin hər ifası böyük alqışla qarşılanıb.

    Xalq artisti Məleykə Əsədova istirahətdən qayıdıb. Belə ki , qızı Gülər və yaxın rəfiqəsi ilə Asiya ölkələrinə səyahət edən xalq artisti Yaponiyanın Osaka və Kokosima şəhərlərində, Tayvan, Honqkonq, Sinqapur, Malayziyada, Vyetnamın iki şəhərində dincəlib. Aktrisa istirahət vaxtı bir sıra şəkillərdə çəkdirib.

     Müğənni Elnarə Xəlilova saç boyası reklamında çəkilib. Sözügedən video çarx artıq tam hazırdır. Nəzərinizə çatdıraq ki, xanım Xəlilova bir müddət bundan öncə başqa reklam çarxının da siması olub.

     Prodüser Tolik müğənni Sevda Yahyayevanın yeni mövsümdə görəcəyi işlər haqqında danışıb: “Sevda artıq yeni mahnılar üzərində işləyir. Yerli müğənnilərin biri ilə də duet oxuyacaq. Amma adını söyləməyəcəm. Qoy hamıya sürpriz olsun. Çünki həmin müğənninin kimliyi hər kəsi çox təccübləndirəcək”. Prodüser müğənninin “Yaşıl” teatrda verəcəyi solo konsertindən də söz açıb: “Sentyabrın 8-i Nahid Emiloğlunun təşkilatçılığı ilə Sevdanın “Yaşıl” teatrda solo konserti keçiriləcək. Aldığım son məlumata görə, biletlərin əksəriyyəti satılıb. Düşünürəm ki, konsert verməyən müğənnilər qorxaqdır. Çünki bilirlər ki, biletləri satılmayacaq və ziyana düşəcəklər”. 

     Müğənni Nadir Qafarzadə bəzi prodüserləri onun ünvanına xoşagəlməz sözlər yazmaqda günahlandırıb:

 “Son vaxtlar bir hal aşkarlamışam, bəzi müğənnilərin prodüserləri sosial şəbəkələrdə ağızlarına gələn rəyləri, təhqirləri yazırlar. Bunun üstünü artıq açmışam. Mənim üçün belə rəylərin əhəmiyyəti yoxdur”.
    Nadir həmçinin son vaxtlar həmkarlarının “bu mahnı partlayacaq” sözünə də cavab verib: “Hamı deyir ki, partladacam. Başa düşmürlər ki, “Maral”dan sonra hansı mahnı partlayıb ki? Onu hələ heç bir bəstə keçə bilməyib”.

 

Fuad Məmmədov

 

Muz-Tv.az