Akademik Milli Dram Teatrının 141-ci mövsümü ilə bağlı mətbuat konfransı keçirildi

Akademik Milli Dram Teatrı 141-ci mövsümünə hazırlaşır. Elə bu münasibətlə media əhlini başına toplayan teatrın direktoru İsrafil İsrafilov kollektivin gələn planları haqqında...

   Akademik Milli Dram Teatrı 141-ci mövsümünə hazırlaşır. Elə bu münasibətlə media əhlini başına toplayan teatrın direktoru İsrafil İsrafilov kollektivin gələn planları haqqında danışıb. Teatrda 141-ci mövsümdə də qızğın yaradıcılıq prosesi səngimədən davam edəcək. İsrafil bəy bu il repertuara həm müasir, həm də klassik dramaturgiya nümunələri daxil etdiklərini bildirib.

   İsrafil İsrafilovun sözlərinə görə, artıq bir neçə məşhur simalarla da əməkdaşlıq barədə danışıqlar aparılır. Bundan əlavə bu il Akademik Milli Dram Teatrı gənc dramaturqlarla da işləmək fikrindədir.  İsrafil bəy 141-ci mövsümdən danışarkən bir məqamı da vurğulamağı unutmayıb. Belə ki, bu il dünyaca məşhur Polşa rejissoru Kşiştof Zanussinin Akademik Milli Dram Teatrının səhnəsində tamaşa hazırlaması planlaşdırılır.

   Bundan əlavə, teatrın direktoru 2014-cü il üçün də səhnələşdirməyi nəzərdə tutduqları bir neçə əsərin adını açıqlayıb. Qeyd edək ki, Akademik Milli Dram Teatrı yeni mövsümə sentyabrın 21-də nümayiş etdirəcəyi “Şah Qacar” tamaşası ilə start verəcək.

 

Sahilə Aslanova                       

Bəxtiyar Nəsirov

 

Muz-Tv.az