Səxavət Məmmədovun 60 illik yubileyi keçirildi

Noyabrın 25-də Beynəlxalq Muğam Mərkəzində muğam ustası, görkəmli xanəndə Səxavət Məmmədovun 60 illik yubileyi münasibəti ilə konsert keçirilib.

    Noyabrın 25-də Beynəlxalq Muğam Mərkəzində muğam ustası, görkəmli xanəndə Səxavət Məmmədovun 60 illik yubileyi münasibəti ilə konsert keçirilib.

Tədbirdən əvvəl suallarımızı cavablandıran sənətkarın oğlu Bəxtiyar Məmmədov və qardaşı, əməkdar artist Firuz Səxavət xanəndə haqqında ürək sözlərini bölüşüblər.

    Gecəyə qonaq qismində qatılan xalq artisti Zabit Nəbizadə, əməkdar artist Vamiq Məmmədəliyev və millət vəkili Qənirə Paşayeva da sənətkarın musiqimizə verdiyi töhfədən danışıblar. Mərasimdə ilk olaraq çıxış edən xalq artistləri İlham Əsgərov  və Siyavuş Kərimi Səxavət Məmmədovun həyat və yaradıcılığından danışaraq onun Azərbaycan xanəndəlik məktəbinin parlaq nümayəndələrindən biri olduğunu vurğulayıblar.

Yubiley gecəsində həmçinin xanəndə haqqında kiçik bir video çarx da nümayiş edilib.

    Tədbirdə “Qarabağ” instrumental ansamblının müşayiəti ilə xalq artistləri Mələkxanım Əyyubova, Nəzakət Teymurova və başqaları sənətkarın bir zamanlar ifa etdiyi muğam və xalq mahnılarını səsləndiriblər. Qeyd edək ki, Səxavət Məmmədovun anım gecəsi Mədəniyyət və Turizm Nazirliyinin dəstəyi, Xan Şuşinski fondunun təşkilatçılığı ilə baş tutub.

 

Sahilə Aslanova

Ramal Gülməmmədov

 

Muz-Tv.az