Nadir Qafarzadə: “Yeni körpəm dünyaya gəlib”
“Az sayda adam bilir ki, mənim bir neçə gün öncə yeni körpəm dünyaya gəlib”. Bu sözləri müğənni Nadir Qafarzadə söz və musiqisi Tural Bayrəməliyevə məxsus...
“Az sayda adam bilir ki, mənim bir neçə gün öncə yeni körpəm dünyaya gəlib”. Bu sözləri müğənni Nadir Qafarzadə söz və musiqisi Tural Bayrəməliyevə məxsus olan “Xainsən” adlı mahnısını təqdim edərkən deyib: “Bəlkə də bir çoxları mənim bu fikrimə qeyri-adi yanaşacaq. Amma qoy hər kəs bilsin ki, ifa etdiyim mahnılar mənim övladımdır. Çünki, mən bir mahnını oxumazdan öncə ona qulaq asmalı, doğma bilməli, daha sonra ifa etməliyəm. Bütün mahnılarım mənim övladım sayılır. Bir neçə gün öncə isə yeni körpəm dünyaya gəlib. Bu mənim “Xainsən” adlı mahnımdır”.
Bəstəkar-ifaçı Emin Ağalarovun yenicə işıq üzü görən “Na krayu” adlı albomu maraqla qarşılanıb. Onun yeni diski mobil telefonlarda ən çox istifadə edilən mahnı tətbiqetməsi olan “iTunes”də üçüncü olub. Albom cəmi üç gün ərzində ən çox satılanlar siyahısında yer alaraq rekord qırıb. Birinci yerdə Beyonsun, ikinci yerdə isə rok qrupu “Zveri” qərarlaşıb. Qeyd edək ki, Emin rus dilində ifa etdiyi mahnıların yer aldığı ilk albomunu ötən həftə təqdim edib. Bu satışdan əldə olunacaq gəlir xeyriyyə işlərinə sərf ediləcək.
Əməkdar artist Tünzalə Ağayeva geyimlərindən söz açıb. Müğənni modelyer Gülnarə Xəlilovanın onun üçün özəl libaslar hazırladığını bildirib: “Uzun müddətdir ki, Gülnarə ilə işləyirəm. Səhnə geyimlərimin əksəriyyətini o hazırlayır. Zövqümü, nə istədiyimi, mənə yaraşanı bilir. Onun geyimləri Tünzalə Ağayevanı əks etdirir, tərzimə uyğun gəlir. Buna görə də Gülnarənin hazırladığı libaslarda özümü çox rahat hiss edirəm. "Tünzalə" deyəndə nə təsəvvür olunursa, geyimlərdə də onu yaradır”. Eynək və yaylıq taxmağı sevən Tünzalə Ağayeva gələcəkdə öz brendini yaradacağını da bildirib: “Dünya ulduzlarının öz parfümləri, geyim brendləri var. Bizdə bu hələ alınmır. Çünki əhali azdır. Onların 30-100 milyon pərəstişkarı var. Biz isə 9 milyonluq əhaliyik. Amma gələcəkdə yaylıq və ya eynək brendi yaratmaq istərdim”.
Eldar Qasımov Yeni ilə hazırlaşır.Axşam.az-ın məlumatına görə, müğənni ötən gün küknar ağacı bəzəyib. O, bayramı ailəsi və dostları ilə qeyd edəcəyini bildirib: “Yeni il ağacını həvəslə quraşdırıram. 2014-cü ili gözəl qarşılayacam”. İfaçı həmin günü ailəsi və dostları ilə qeyd edəcəyini bildirib:“Məndə adət halını alıb, bayram gecəsi saat 00:00-da ailəmin yanında oluram. Daha sonra isə dostlarımla görüşürəm, qeyd edirəm. Bu il də ənənəmə sadiq qalacam. Şou-proqramlara qatılıb-qatılmayacağımı bilmirəm”.
Sərvər Mehdiyev
Muz-Tv.az