Faiq Ağayev: “Bəziləri kimi pasportumu dəyişmək fikrində deyiləm”

Dekabrın 28-də doğum gününü qeyd etməyə hazırlaşan xalq artisti Faiq Ağayev həmkarlarını qıcıqlandıracaq açıqlama verib.

    Dekabrın 28-də doğum gününü qeyd etməyə hazırlaşan xalq artisti Faiq Ağayev həmkarlarını qıcıqlandıracaq açıqlama verib. Axşam.az-ın məlumatına görə, müğənni müsahibəsində özəl günündən söz açıb: “42 yaşım tamam olur. Bunu gizlətmək, bəziləri kimi pasportumu dəyişmək fikrində deyiləm. Səhnə fəaliyyətimin 26-cı ilinə keçirəm. Özümü də elə bu yaşdakı kimi hiss edirəm. Bu il ad günümü keçirməyəcəm. Məndə adət halını alıb, əgər konsert verirəmsə, həmin il doğum günümü qeyd edirəm. Bu il isə konsertim olmadı. Yalnız ailəm və beş-altı yaxınlarımla birlikdə olacağam”.

   Meyxanaçı Namiq Qaraçuxurlu küsülü olduğu xalq artisti Nisə Qasımova ilə barışıb. Sənətçi açıqlamasında barışıq üçün ilk addımı özünün atdığını bildirib: “Həmişə barışıq tərəfdarı olmuşam. Günahkaramsa, zəng vurub aydınlıq gətirmişəm. Nisə xanım sənətkardır. Bir dəfə maqazin verilişlərinin birində anlaşmazlıq baş verdi. Ondan sonra məndən incidi. Mən də zəng vurub danışdım, məsələyə aydınlıq gətirdim”. Məsələ ilə bağlı fikirlərini bölüşən Nisə Qasımova Namiqə qarşı kin saxlamır: “Aramızdakı yaş fərqini nəzərə alıb özü mənə zəng vurdu. Ona dedim ki, Namiq, sənin kimi gözəl tərbiyəyə sahib olan birindən bunu gözləməzdim. Məsələyə aydınlıq gətirdik, indi inciklik qalmayıb”.

    Müğənni Yaşar Cəlilov evlənmək sevdasına düşüb. İfaçı açıqlamasında ürəyincə sevəcəyi qız tapmamasından şikayət edib: “Evlənmək istədiyim şəxsi seçib sonra peşman olmuşam. Məni istədiyim kimi sevəcək bir xanım olmayıb. Düzgün addım atan birini tapmıram. Ona görə də hələ subay gəzməliyəm” –deyə gənc müğənni bildirib.

    Türkiyədə yaşayan müğənni İradə İbrahimova Yeni ilə hazırlaşır. Qızı İpək üçün Yeni il ağacı quran sənətçi ona hədiyyələr alıb.

 

Sahilə Aslanova

 

Muz-Tv.az