86-cı “Oskar” mükafatlarına namizədlərin adları açıqlandı

Yanvarın 16-da Hollivudda nüfuzlu  86-cı “Oskar” mükafatına namizədlərin adları açıqlanıb. Mərasimdə “Qravitasiya” filmi 10, “12 illik qul həyatı” isə 9 kateqoriyada...

    Yanvarın 16-da Hollivudda nüfuzlu  86-cı “Oskar” mükafatına namizədlərin adları açıqlanıb. Mərasimdə “Qravitasiya” filmi 10, “12 illik qul həyatı” isə 9 kateqoriyada yarışacaqlar. “Ən yaxşı rejissor işi” nominasiyasında Martin Skorseze, Stiv Makkuin, Aleksandr Peyn kimi məşhurlar yer alıb. “İlin ən yaxşı aktyoru” qismində Leonardo Di Kaprio, Metyu Makkonahi və Kristian Beyl kimi aktyorlar yarışacaq. Sandra Ballok, Keyt Blanşet, Meril Strip və digər aktrisalar “Ən yaxşı aktrisa” adı uğrunda mübarizə aparacaq. Mükafatlandırma mərasiminin ən vacib kateqoriyası olan “İlin ən yaxşı filmi” kateqoriyasında isə “Qravitasiya”, “Nebraska”, “Filomena”, “Uoll Strit canavarı”, “Kapitan Fillips” kimi ekran əsərləri yer alıb. Xatırladaq ki, mərasim martın 2-də baş tutacaq. Gecəni məşhur aparıcı Ellen Deceneres aparacaq.

   Hollivud ulduzu Robert Dauni və müğənni Stinq birgə duet ifa ediblər. Cütlük “Police” qrupunun “Driven to Tears” mahnısını səsləndirib. Məşhurların yer aldığı video qısa müddətdə “Youtube” video hostinqində böyük populyarlıq qazanıb və milyondan çox izlənib.

   Müğənni Ledi Qaqa həril keçirilən “Qızıl moruq” mükafatlarında “Ən pis aktrisa” adına layiq görülə bilər. Belə ki, Hollivudda “Oskar”la yanaşı “Qızıl Moruq” mükafatlarına namizədlərin də adı açıqlanıb. Siyahıda qalmaqallı Ledi Qaqa “Maçete öldürür” filmindəki roluna görə bu nominasiyaya layiq görülüb. Həmçinin eyni kateqoriyada ulduzla yanaşı, Selena Qomes, Helli Berri, Lindsey Lohan, Salma Hayek da yarışacaq. Mərasim martın 1-də baş tutacaq.

   “Çalıquşu” serialı ilə məşhurlaşan aktrisa Aydan Şənər Fəxriyyə Evcən və Burak Özçivitin rol aldığı yeni “Çalıquşu” haqqında sual verən müxbirlərə qəzəblənib. Ulduz qatıldığı bir mərasimdə serialla bağlı suallar qarşısında: “Bir də məndən “Çalıquşu” ilə bağlı heç nə soruşmayın. Ümid edirəm uğurları bol olar” –deyib.

 

Sahilə Aslanova

 

Muz-Tv.az