Mustafa Sandal Bakıya gəlir

Türkiyəli müğənni Mustafa Sandal Bakıya gələcək. Axşam.az-ın məlumatına görə, sənətçi aprelin 5-də Heydər Əliyev Sarayında konsert verəcək. 

   Türkiyəli müğənni Mustafa Sandal Bakıya gələcək. Axşam.az-ın məlumatına görə, sənətçi aprelin 5-də Heydər Əliyev Sarayında konsert verəcək. Bu, müğənninin Bakıda ilk konserti olacaq. Türkiyənin sevilən ifaçılarından olan Mustafa “All my life”, “Moonlight”, “İsyankar”, “Araba” kimi mahnıların müəllifidir.  

   Müğənni Sevda Yahyayeva və Elçin Cəfərov ötən gecə Fəvvarələr meydanında görüntüləniblər.  Şəhərin mərkəzində, küçədə, cütlük son vaxtlar hit olan duetini - “Səni sevirəm”i oxuyub. Qeyd edək ki, bu çəkiliş Dövlət televiziyasının təşəbbüsü ilə gerçəkləşib. Çəkilişdə Sevda və Elçinlə yanaşı, Zamiq Hüseynov və digərləri də olublar.

    Müğənni Samir Piriyev Dubaya yollanacaq. Sənətçi bu haqda özü  açıqlama verib. İfaçı yeni klipini məhz orada çəkdirəcəyini bildirib: “Yeni bir layihəmiz var. Yaxın günlərdə Dubaya klip çəkməyə gedirik. Klipdəki tərəf müqabilim repçi Qurd olacaq. Bu işdə prodüser Anar Mədətov bizi bir araya gətirib. Mahnının ab-havası istidir. Qarşıdan da yay gəlir. Ekran işində rəqqasələr də yer alacaq”.

    Müğənni Nadir Qafarzadə Rusiya şou-biznesinə qatılmaqda ona mane olduqlarını etiraf edib. Sənətçi ona bir qadının mane olduğunu bildirib: “Mənim evimi bir qadın yıxdı. 8 il bundan əvvəl Rusiya şou-biznesinə qatılmaq istəyirdim. Amma o, yolumu bağladı, mənə mane oldu. Əgər alınsaydı, indi Rusiyanın ən məşhur meqastarı, superstarı idim. Azərbaycanda 1 ilə ulduz olmaq mümkündür, 8 ilə nələr etməzdim?”.

 

Sahilə Aslanova

 

Muz-Tv.az