Xalq artisti həmkarlarının onu təkrarladığını dedi

Xalq artisti Brilliant Dadaşova açıqlama verib. Axşam.az-ın məlumatına görə, sənətçi həmkarlarının onu təkrarladığını bildirib...

    Xalq artisti Brilliant Dadaşova açıqlama verib. Axşam.az-ın məlumatına görə, sənətçi həmkarlarının onu təkrarladığını bildirib: “Xanım İsmayılqızının Cəlal Qurbanovun sözlərinə bəstələdiyi mahnını oxuyacağam. Digər mahnım isə Faiq Sücəddinovdan olacaq. Son vaxtlar klassiklərimizdən oxuyurdum: Rəşid Behbudovdan, Şövkət Ələkbərovadan. Daha mürəkkəb mahnılara müraciət edirdim ki, onları indiki gənclərimiz eşitməyib. Məndən sonra bu, tendesiya halını aldı, hamı başladı köhnə mahnılar oxumağa”. Dadaşova yaxın günlərdə Türkiyəyə gedəcəyini bildirib.

    Əməkdar artist Fidan Hacıyeva Londonda solo-konsert verib. Novruz ərəfəsində təşkil olunan konsert “Yazın səsi” adlanıb. Bununla bağlı təəssüratlarını bölüşən Hacıyeva bildirib ki, konsert Mədəniyyət və Turizm Nazirliyinin və Azərbaycanın Böyük Britaniyadakı Səfirliyinin dəstəyi ilə 400 nəfərlik tamaşaçı tutumu olan “King`s Place” incəsənət və kulinariya mərkəzində olub: “Çox gözəl bir konsert oldu. Gecədə tamaşaçıların çoxu ingilislər idi. Həqiqətən də konsertin təşkilatçılığı yüksək səviyyədə təşkil olunmuşdu. Konsertdə yeniliklərdən biri də o idi ki, Azərbaycan klassik musiqilərini ingilis dilində ifa etdim. Dəfələrlə izləyicilər tərəfindən ayaq üstə alqışlandım və bu, klassik musiqimizin təntənəsidir”. Fidan Hacıyeva onu da əlavə edib ki, “Royal Opera House”da çıxış etmək təklifi alıb.

    Müğənni Səbinə Babayeva arıq qalmasının sirrini açıqlayıb. Sənətçi pəhriz saxlamadığını deyib: “Heç vaxt pəhriz saxlamıram. Elə düşünürəm ki, heç vaxt da buna ehtiyacım olmayacaq. Anadangəlmə arığam. Həm də üzərək formada qalıram”.

    Müğənni Ayan Babakişiyeva həyat yoldaşı Füzuli Musayevlə çəkdirdiyi və “Facebook” səhifəsində yaydığı fotolarından danışıb. Müğənni ailə qurduğu bəylə çəkdirdiyi şəkilləri ötən gün paylaşmaq qərarına gəldiyini bildirib: “Ötən gün “Facebook” səhifəmdə şəkillər yaydım. Paylaşdığım fotoların hər birinə isə şərhlər qeyd etmişəm. Həmin şərhlərdən sonra nəsə deməyim yaxşı deyil. Məncə, şəkillər hər şeyi deyir. Həm də yenidən bir söz desəm, şəxsi həyatım müzakirə olunacaq. Bu da mənə xoş deyil. Dünən ürəyim istədi, şəkilləri paylaşdım, saytlar da yazdı”.

 

Sahilə Aslanova

 

Muz-Tv.az