Fəxrəddin Manafov səhnədən getdimi?
Xalq artisti Fəxrəddin Manafov Səməd Vurğun adına Rus Dram Teatrından getməsi xəbərini təsdiqləyib.
Mtv.az xəbər verir ki, aktyor 1news.az-ın redaksiyasına məktub göndərib. Teatr aktyorun işinin başında olduğunu desə də o, bunu inkar edib:
“Bəli, mən teatrdan getmişəm və ümid edirəm ki, bu müvəqqətidir... çünki bəzi problemlər və məsələlər öz həllini tapmalıdır. Bu məsələlərlə bağlı mənim şərtlərim var. Şərtlərim yalnız və yalnız yaradacıcı prosesin inkişafı üçündür. Şərtlərim isə belədir: Ruhi, mənəvi tərəfdən hələ formalaşmamış, özünü vəzifə daşıyıcısı hesab edən aktyorlarla, ümumiyyətlə insanlarla kobud, qaba, tərbiyəsiz davranan adını çəkdiyimiz o teatr məkanında, təsadüf bir şəxsin, olub və ya olmaması şərti... Məşqlər və tamaşa qabağı şərait yaradılması, nizam-intizamın və ümumiyyətlə bir çox problemlərə peşəkar yanaşmağın və onların həlli məsələsi... Bu kimi şərtlər yerinə yetərilsə, o zaman mən öz fəaliyətimi davam edərəm... Amma hal-hazırda mən teatrdan getmişəm... bu və digər şərtlərin həlli nəticəsini gözləyəcəm...
Son olaraq qeyd edirəm və təkidlə vurğulayıram ki, bu məsələ ilə bağlı heç bir müzakirə məni maraqlandırmır və mənim tərəfimdən əlavə şərhlər olmayacaq. Hamıya yaradıcı uğurlar!”
Xatırladaq ki, bir gün əvvəl xalq artisti Fəxrəddin Manafovun Rus Dram Teatrından getməsi ilə bağlı bir neçə gündür xəbər yayılmışdı.
Bu barədə ilk dəfə Hikmət Rəhimov sosial şəbəkədə yazmışdı. Teatrdan xəbərə şərh də bildirilmişdi və onlar F.Manafovun getməsini təkzib ediblər. Aktyor isə zənglərə cavab verməyib.
H.Rəhimov yenidən sosial şəbəkədə məsələ ilə bağlı status yazıb.
O, F.Manafovla yazdıqlarına belə aydınlıq gətirib: “Fəxrəddin Manafovun teatrdan getməyi haqqında yazdığım status mənə əziz olan həmkarlarımı əsəbiləşdirib. Gəlin, məsələyə daha ətraflı yanaşım. Əvvəla, mən Fəxrəddin Manafovun şəxsiyyəti haqda heç nə yazmamışam, yazmaram da. Ən azından çörəyini yediyi və kinolarında çəkildiyi Rüstəm İbrahimbəyov haqqında son dediklərinə görə...O vaxt da nəsə yazmaq istədim, sonra lənət şeytana dedim. Fuad Poladovla Fəxrəddin Manafovun teatrdan getməyini müqayisə etmək belə ən azından sadəlöhvlük olar. Əqidə baxımından Fuad müəllimə çatmaq mümkünsüz bir şeydir. Fəxrəddin bəy indiyə qədər teatr və kino sahəsində baş verənlərə bir ziyalı olaraq heç vaxt münasibət bildirməyib. Açığı heç gözləmirdim də. Səsləndirdiyi tək fikir Rüstəm İbrahimbəyov haqqında olub. Öz işidir və marağıdır. Yəqin ki, marağı müqabilində mükafatnı da alıb, ya da alacaq. İndiyə qədər bir gənc istedadlı insana dəstəyini də görməmişəm.
Fəxrəddin Manafov əsl aktyordur. Bunu danmaq nadanlıq olar və günahdır. Hər halı ilə bu insan teatrda olmalıdır. Çünki bu insanın peşəsini sevənlər var. Yeri gələndə, onun teatrda nazı ilə də oynamalıdırlar. Bu baxımdan ehtiyacı olmasa belə, Fəxrəddin bəyə dəstək olmaq istədim və dəstəyəm də. Baxmayaraq ki, mən teatrdan gedəndə fikir də bildirmədi.
Sonda bunu da qeyd edim ki, mən indiyə qədər Fəxrəddin Manafovla salamlaşmamışam. Buna da əsasım var. Bir kiçik olaraq yaşca böyük aktyora dəstəyəm. Çünki teatr sistemi həmkarlarımı çürüdür. Özünüzü qoruyun, bir-birinizi satmayın! Onsuz da çox azsız”.