Xalq artisti Firəngiz Mütəllimova bu gün 55 yaşını qeyd edir

Bu gün xalq artisti Firəngiz Mütəllimovanın ad günüdür. O, 1959-cu ildə Ağcabədi rayonunda doğulub. Əslən şuşalıdır.

     Bu gün xalq artisti Firəngiz Mütəllimovanın ad günüdür. O, 1959-cu ildə Ağcabədi rayonunda doğulub. Əslən şuşalıdır. 1976-cı ildə Azərbaycan Dövlət İncəsənət İnstitutunun dram və kino aktyorluğu fakültəsinə daxil olub və 1980-ci ildə oranı bitirib. Həmin il Azərbaycan Akademik Milli Dram Teatrına aktrisa götürülüb. Elə ilk gündən ona məsul rollar tapşırılıb. Teatrda səmərəli fəaliyyət göstərən Firəngiz Mütəllimova paralel olaraq televiziya tamaşalarında da iştirak edib. Aktrisa Azərbaycan Dövlət Televiziyasında hazırlanmış iyirmidən çox teletamaşada müxtəlif səpkili rollar ifa edib. Onlardan "Evləri köndələn yar", "Yad qızı", "Göz həkimi" və s. tamaşalarını qeyd etmək olar. O,  "Azərbaycanfilm" kinostudiyasında istehsal edilən "Qaçaq Nəbi" , "Qocalar, qocalar" , "Bəyin oğurlanması" , "İşarəni dənizdən gözləyin" , bədii filmlərində, "Mənim ağ şəhərim" , "Şərəf" telefilmlərində aparıcı rollar oynayıb. Firəngiz Mütəllimovaya 1986-cı ildə Naxçıvan Muxtar Respublikasının əməkdar artisti, 1991-ci ildə Azərbaycan Respublikasının əməkdar artisti və 2002-ci ildə xalq artisti fəxri adları verilib. Prezident təqaüdçüsüdür. 9 may 2012-ci ildə Prezident Mükafatına layiq görülüb. “Muz Life” komandası aktrisanı ad günü münasibəti ilə təbrik edir.

    Bu gün həmçinin müğənni İradə İbrahimovanın da ad günüdür. Sənətçini sosial şəbəkədə bir çox həmkarı təbrik edib. Onu təbrik edənlər arasında bacısı, vizajist Nigar İbrahimova da yer alıb. Tanınmış vizajist İradə İbrahimova üçün bu sözləri yazıb:“Bacım, canım, tək güvənim. Allah səni bizim, ailən və səni sevən insanlar üçün qorusun. Hər zaman qürur duyduğum oldun. Qəlbin daima gülsün, sevincli günlərin bol olsun. Həyatın firəvan, hüzurlu, xoşbəxt keçsin. Səni İstanbul vaxtı ilə təbrik edirəm. Ad günün mübarək ağıllı bacım”.

   Bir müddətdir Türkiyədə olan müğənni Rəqsanə İsmayılova ötən gün Moskvaya yollanıb. Axşam.az-ın məlumatına görə, sənətçi uzun saçlarını kəsdirib. İnstaqram səhifəsində yeni görünüşdə çəkdirdiyi fotoları paylaşan Rəqsanə “Uzun saçlarım yoxdur. Bir neçə gün belə qalacam” sözlərini yazıb.

   Əməkdar artist, balaban  ustası Əlixan Səmədov evlənir. Axşam.az-ın məlumatına görə, sənətçi Ellada adlı xanımla nikah masasına oturacaq. Məşhur balabançı bu münasibətlə İstanbulda azərbaycanlılara məxsus olan restoranların birində qonaqlıq verəcək. Qeyd edək ki, Əlixan Səmədov ilk dəfə türkiyəli bir xanımla ailə qurmuşdu.

 

Sərvər Mehdiyev

 

Muz-Tv.az