Tünzalə Ağayeva Röyaya cavab verdi

Müğənni Röya Ayxan müsahibələrindən birində əməkdar artisti Tünzalə Ağayevadan mahnı istədiyini, amma sənətçinin onu aldatdığını və neçə illərdir verdiyi sözə...

    Müğənni Röya Ayxan müsahibələrindən birində əməkdar artisti Tünzalə Ağayevadan mahnı istədiyini, amma sənətçinin onu aldatdığını və neçə illərdir verdiyi sözə əməl etmədiyini bildirmişdi. Axşam.az-ın məlumatına görə, Tünzalə xanım Röyanın sözlərini təsdiqləyərək bunları deyib: “Röya düz deyir. Onun üçün mahnı bəstələməyə söz vermişəm. Amma  bəstələrə vaxt ayırmağa imkan olmur. Son vaxtlar xarici səfərlərim çoxalıb, insanlara verdiyim sözləri yerinə yetirə bilmirəm”.

    Əməkdar artist Lalə Məmmədova tədbirlərin birində fotokameralara tuş gəlib.  Kökəldiyi diqqətdən yayınmayan müğənni buna görə narahat olmadığını deyib: “Belə bir vacib işə görə artıq çəki almaq məni narahat etmir. Bu dəqiqə mənim üçün qızım Çinarə hər şeydən daha əhəmiyyətlidir. Onun sağlam, ana südü ilə qidalanması daha vacibdir. Təki artıq çəki övladıma görə olsun. O, mənim üçün dünyanın ən gözəl mələyidir. Çox sakit uşaqdır. Bacısı da onu çox istəyir, heç qısqanmır”. Yaradıcılığındakı yeniliklərdən də danışan Lalə xanım bəstəkarlardan mahnılar aldığını deyib: “Vüqar Camalzadə mənim üçün mahnılar yazıb. Hələ övladım dünyaya gəlməmiş təkliflər alırdım. Aygün Səmədzadənin “Bir sevgi” mahnısı yaxın günlərdə üzə çıxacaq. Bu kök halımla klip də çəkdirəcəm. Aygün Səmədzadənin Qənirə Paşayevanın sözlərinə bəstələdiyi “Dəli eşq” mahnısının klipi olacaq”.

    Müğənni Günay İbrahimli nakam sevgisindən danışıb. Hazırda qəlbi boş olan sənətçi depressiyaya düşməkdən qorxur: “Mənim də həyatımda nakam sevgi olub. Bundan peşman da deyiləm. Sevgi pis hiss deyil. Vay o günə heç sevməyəsən. Bu hissi bilməyənə yazıq kimi baxıram. Hazırda qəlbim boşdur. Həyatımda kimsə olsa deyəcəm, gizlətməyi xoşlamıram. Məni istəyənlər çoxdur. Amma ətrafımda çox xəyanət, boşanma görürəm. Bu da psixologiyama təsir edir. Deyirəm münasibət quraram, alınmaz, depressiyaya düşərəm”.

    Müğənni İlhamə Qasımova talassemiya xəstələri üçün keçirilən xeyriyyə tədbirinə qatılıb. Fotolarını İnstaqram səhifəsində paylaşan sənətçi sosial xarakterli layihələrə imkan olduqca tez-tez qatıldığını bildirib. O, “Bu gün talassemiya xəstələri üçün nəzərdə tutulan android enerji qolbaqlarının təqdimatında iştirak etdim. Hər kəsi talassemiyadan əziyyət çəkən insanlara yardım etməyə çağırıram. Siz bir neçə insanın həyatını xilas edə bilərsiniz” - deyə əlavə edib.

 

Sahilə Aslanova

 

Muz-Tv.az