Emin Ağalarov sosial layihədə iştirak etdi

Bəstəkar-ifaçı Emin Ağalarov “Xərçəng əleyhinə birləşək” adlı sosial layihədə iştirak edib. 

    Bəstəkar-ifaçı Emin Ağalarov “Xərçəng əleyhinə birləşək” adlı sosial layihədə iştirak edib. Axşam.az-ın xəbərinə görə, xərçəng xəstəliyindən əziyyət çəkənlərə yardım məqsədilə nəzərdə tutulan layihə çərçivəsində video çarx çəkilib. Çarxda tanınmış simalar yer alıb. Onlar xəstəlik haqqında danışaraq, insanları onunla bağlı daha çox məlumat əldə etməyə çağırıblar. Xəstəlikdən əziyyət çəkənlərə dəstək olublar. Qeyd edək ki, çarxda Eminlə yanaşı aktrisa Darya Moroz, Marina Aleksandrova da yer alıb.

   Müğənni Günay İbrahimli Ankaraya gedib. Səfər işlə bağlıdır. Belə ki, Günay orada bir neçə verilişdə iştirak edib.  Müğənni “TRT AVAZ” kanalında yayımlanan “Yeni gün” verilişinin qonağı olub. Canlı yayımda sevilən mahnılarını səsləndirən Günay, eyni zamanda türkiyəli ifaçı Sezen Aksunun repertuarına da müraciət edib. Günayın canlı ifası alqışlarla qarşılanıb.

   Əməkdar artist Abbas Bağırov mərhum sənətkar Məmmədbağır Bağırzadənin repertuarına müraciət edib. Müğənni verilişlərin birində açıqlamasında “Subayların toyunda” adlı mahnını yeni aranjimanda təqdim edəcəyini bildirib: “Bu kompozisiyanı toylarımın sayını artırmaq üçün oxumuram. Ona görə oxuyuram ki, toylarımızdakı adət-ənənələr itməsin. Buna maraqlı bir klip də çəkəcəyik. Ekran işini robotlara həsr edəcəyik”. Abbas Bağırov iki solo konsert verəcəyini də deyib. O, bu münasibətlə yaxın günlərdə mətbuat konfransı keçirəcək.

   Şəxsi həyatından danışan müğənni Rəqsanə İsmayılova sevidiyini, gözəl münasibəti olduğunu bildirib: “Həyatımda çox hadisələr olub. Sevmişəm, ayrılmışam. Bir gün qarşıma məqsəd qoydum ki, bunlara son qoymalıyam. Sevib ayrılmaq, oturub ağlamaq mənə yaraşmaz. Qızım var, bir müddət sonra nənə olacam. Qərar verdim ki, ya ailə qurmalıyam, ya da sevgi macəralarına son qoymalıyam. Sevdim, ailə qurdum. Sevməsəm, sevilməsəm, bu gün belə enerjili olmazdım. Sevirəm, gözlərimin içi parıldayır. İnsan həyatda hər şey qazana bilər. Pula, var-dövlətə əhəmiyyət vermirəm. Ən önəmlisi can sağlığıdır”.

 

Sahilə Aslanova

 

Muz-Tv.az