Rusiyalı müğənni Azərbaycanda klip çəkdirir

Rusiyalı müğənni Sati Kazanova Bakıya gəlib.  Axşam.az-ın məlumatına görə, tanınmış ifaçı yeni klipini, məhz, Bakıda çəkdirmək istəyib. 

   Rusiyalı müğənni Sati Kazanova Bakıya gəlib.  Axşam.az-ın məlumatına görə, tanınmış ifaçı yeni klipini, məhz, Bakıda çəkdirmək istəyib. İçəri Şəhəri, dəniz kənarını gəzən Sati təəssüratlarını İnstaqram səhifəsində bölüşüb. Kazanova bəstəkar-müğənni Emin Ağalarovun "Sea Breeze" otelində qalıb: “İçəri şəhər – nağıl kimidir. Bakıya aşiq oldum. Dünyanın ən gözəl şəhərlərindən biridir. Əhalinin qonaqpərvərliyinə isə söz ola bilməz. Bu işdə bizə dəstək olan Emin Ağalarova xüsusi minnətdaram”.

   Əməkdar artist Manana yeni klipinin çəkilişlərinə start verib. “Gözlərin danışsın” adlı mahnının ekran işi rejissor Nail Naiboğluna həvalə olunub. Bəstənin sözləri İkram Əliyevə, musiqisi Nailə Mirməmmədliyə məxsusdur. Klipdə Manananın imici üzərində stilist Anar Ağakişiyev çalışıb.

   Müğənni Rəhim Rəhimli xalq artisti Aygün Kazımovaya hədiyyə hazırlayıb.
Sənətçi Kazımova üçün bəstələdiyi “Dildarım” mahnısını yenidən aranjiman etdirəcək. Bu barədə verdiyi açıqlamada danışan Rəhim onu xalq artistinə hədiyyə edəcəyini deyib: “"Dildarım" sevilən mahnıdır. Yaxşı mahnılar heç zaman unudulmur. Mən də qərara gəldim ki, onu yenidən aranjiman etdirim və Aygün xanıma bağışlayım”. Aygün Kazımova da Rəhimdən yeni mahnı istədiyini gizlətməyib.

   Əməkdar artist Nüşabə Ələsgərlini bu dəfə də türk müğənnisi Seda Sayana bənzədiblər. Saç düzümünü dəyişən müğənni açıqlamasında hər kəsin onu türkiyəli sənətçiyə bənzətdiyini deyib: “Yeni saç düzümümdə fotolarımı İnstaqramda paylaşmışdım, hamı Seda Sayana bənzədiyimi yazıb. Saçımı burdum, Alla Puqaçova dediniz, indi də Seda Sayan oldum. Bunlar mənə xoşdur. Özümü qəsdən heç kimə oxşatmıram. Həm də Alla Puqaçova balaca adam deyil, şərəfli bir sənətkardır. Ona bənzədilmək gözəldir, amma insan özü kimi olsa, daha yaxşıdır”.

 

Sahilə Aslanova

 

Muz-Tv.az