“Miss Globe International” müsabiqəsinin final mərhələsi Azərbaycanda keçiriləcək

Dünyanın ən böyük gözəllik yarışması – 89-cu “Miss Globe International” müsabiqəsinin final mərhələsi bu il ilk dəfə olaraq ölkəmizdə keçiriləcək. 

   Dünyanın ən böyük gözəllik yarışması – 89-cu “Miss Globe International” müsabiqəsinin final mərhələsi bu il ilk dəfə olaraq ölkəmizdə keçiriləcək. Elə bu münasibətlə paytaxtın məşhur gecə klublarından biri olan “Eleven”-də mətbuat konfransı təşkil edilib. Tədbirdə söz alan müsabiqənin təşkilatçıları yarışma haqqında məlumat veriblər. “Miss Globe İnternational”-ın sahibi Rasim Aydın mərasimin ölkəmizdə keçirilməsinin digər ölkələr tərəfindən müsbət qarşılanmasından danışıb.

   Daha sonra “Miss Globe İnternational”-ın sahibi Rasim Aydınla Merac Productionun prezidenti Səbuhi Əliyev arasında müsabiqənin ölkəmizdə keçirilməsi haqqında razılıq sənədi imzalanıb.

   Müsabiqənin təşkilatçılarından biri olan “Signs Art Adventure” şirkətinin prezidenti və layihənin rəhbəri Nigar Məmmədova sözügedən yarışmanın digərlərindən fərqləndiyini söyləyib. Nigar xanım 100-dən çox ölkədən iştirakçının qatılacağı tədbirdə gözəllərin münsiflər tərəfindən  müəyyən xüsusiyyətlərinə görə seçiləcəyini də açıqlayıb.

   Mətbuat konfransında Türkiyəni təmsil edəcək iştirakçı xanım da ölkəmizə təşrif buyurmaqdan duyduğu sevinci dilə gətirdi. Gözəl yarışmaçı rəqiblərinin güclü olmasına baxmayaraq, özünə güvəndiyini söyləyib. Qeyd edək ki, yaxın günlərdə “Miss Globe Azerbaijan” üçün kastinq elan olunacaq. 20-30 may tarixləri arasında ölkəmizi bu nüfuzlu beynəlxalq gözəllik yarımasında təmsil edəcək Azərbaycan gözəli müəyyən olunacaq. “Miss Globe İnternational”ın 89-cu finalı isə iyunun 21-də Crystall Hall-da keçiriləcək.

 

Sahilə Aslanova

Ramal Gülməmmədov

 

Muz-Tv.az