Sevda Ələkbərzadə Stinqi plagiatda günahlandırır

Əməkdar artist Sevda Ələkbərzadənin dünya şöhrətli müğənni Stinqin mahnısını oğurladığı iddia olunur.  

   Əməkdar artist Sevda Ələkbərzadənin dünya şöhrətli müğənni Stinqin mahnısını oğurladığı iddia olunur.  Teleqraf.com xəbər verir ki, sənətçimizin oxuduğu “Ulu vətən”in Stinqin “A Thousand Years” mahnısının plagiatı olduğu bildirilib. Məsələyə münasibət bildirən Ələkbərzadə əslində Stinqin onun mahnısını mənimsədiyini deyib: “Zaur Abdullayev bu mahnını 1988-ci ildə yazıb, bunu hər kəs bilir, çünki o vaxtlar bir çoxu ifa edib. İlk dəfə bu mahnı 1997-ci ildə lentə alınıb və “Yuxu” qrupu oxuyub”. Qeyd edək ki, bu mahnı 1999-cu ildə Stinqin albomuna daxil edilib. “Yuxu” qrupu isə mahnını albomlarına 2001-ci ildə daxil edib.

   Əməkdar artist Elza Seyidcahanın başına iş gəlib. Tədbirlərin birində maşını ilə fotokameralara tuş gələn müğənni avtomobilinin şüşəsinin naməlum şəxslər tərəfindən sındırıldığını söyləyib: “Bu yaxınlarda oğlumun toyu oldu. Onun toyundan bir neçə gün keçmişdi ki, maşınımın qabaq şüşəsini qırıq vəziyyətdə gördüm. Bunu edənlər gec-tez cəzalarını çəkəcəklər. Dünya malı gəldi, gedərdi. Təki, canımıza bir şey olmasın”.

   Xalq artisti Nisə Qasımova tezliklə yeniliklərini təqdim edəcək. Lent.az-ın məlumatına görə, sənətçi ötən illərdə oxuduğu mahnıları yeni albomda cəmləyəcək. Bundan başqa o, sözləri Hafiz Baxışa, musiqisi Ələkbər Tağıyevə məxsus "Elə baxma" adlı bəstəni yeni versiyada səsləndirib: "Hesab edirəm ki, ifa etdiyim bütün retro  mahnıları müasirləşdirib gənc nəslə çatdırmaq lazımdır. Amma müasirləşdirmə deyərkən artıq klassikaya çevrilmiş əsərlərin tanınmaz hala çevrilməsini nəzərdə tutmuram. Hər dövrün musiqisinin bir texniki tələbi var. Yaxşı ki mənim özümün şəxsi studiyam var və kompozisiyaları illər öncə oxuduğum qaydada, amma daha müasir aranjimanda ifa edə bilirəm."Qeyd edək ki Nisə Qasımova yeni albomunu payız aylarında təqdim etməyə hazırlaşır.  

   Bəstəkar Pərviz Mahmudov və müğənni Sevda Yahyayeva yeddinci iş birliyinə imza atıb. Artıq Sevdanın ifa etdiyi, söz və musiqisi Pərvizə məxsus “Bağlanıb ürək” mahnısı dinləyicilərin ixtiyarına verilib. Daha bir neçə mahnı üzərində çalışan bəstəkar bildirib ki, yeni söz yazarları və musiqiçilərlə işbirliyi qurmağa hazırdır: “Efirlərə çıxmadan belə, daha çox tələb edilən bəstəkar olmağım məni sevindirir. Özümü bu işdə şanslı hesab etdiyim üçün bu imkanı başqa istedadlı insanlara da vermək istəyirəm”. Qeyd edək ki, “Bağlanıb ürək” mahnısını Fərid İman aranjiman edib.

 

Sahilə Aslanova

 

Muz-Tv.az