Xanım Qafarova son mənzilə yola salındı
Yaşamaq uğrunda savaşan əməkdar artist Xanım Qafarova bu gün dünyasını dəyişib. Sənətkar xəstəliyi ilə təkbaşına mübarizə aparsa da, dəfn günündə sevənləri onu
Yaşamaq uğrunda savaşan əməkdar artist Xanım Qafarova bu gün dünyasını dəyişib. Sənətkar xəstəliyi ilə təkbaşına mübarizə aparsa da, dəfn günündə sevənləri onu tək qoymayıblar. O, həyatdan doymadan 47 yaşında vəfat etdi. Balaca qızı üçün yaşamağı hər kəsdən çox istəyən Xanım Qafarovanın bu arzusu həyata keçməyib. 2009-cu ildən bəri xərçəng xəstliyindən əziyyət çəkən sənətin fədaisi anasını və qızını tək qoyub əzablar içində yaşadığı dünyasından ayrılıb. Son dəqiqələrə qədər hafizəsini itirməyən Xanım Qafarova dostları və sevdikləri ilə vidalaşıb.
Elə aktrisanın bacısı oğlunu bu hadisədən yaşadığı kədəri ifadə edərək Xanım Qafarovanın gözlərini yumanadək həyatla mübarizə apardığını söyləyib: “Bu sözləri demək mənim üçün çox çətindir. Xalam son günlərinə qədər həyatla mübarizə aparırdı. O, həyatı sevirdi. Yeganə övladına və anasına görə narahat idi. Elə ancaq onları, əsas da az yaşlı qızını düşünürdü. Yeganə arzusu sağalıb, ayaq üstə durmaq idi. Amma nə etməliyik. Vaxtsız ölüm Allahın qisməti və xalamın alın yazısı imiş. Allah rəhmət eləsin”.
Böyük sənətkar kiçik evindən sevənlərinin gözyaşları ilə yola salınıb. Sənətkar son mənzilə gedərkən mədəniyyət-incəsənət xadimləri, ictiamiyyət nümayəndələri hüznə qərq olub. Hər kəs incəsənət aləminin yaşadığı bu itkidən və uşaq yaşında anasız qalan balacadan narahat idi...
Oynadığı rollarla hər kəsin üzündə təbəssüm yaradan Qafarova gülüşləri sevənlərinin üzündə dondurub. Sənətçi Kürdəxanı kənd qəbiristanlığında dəfn edilib. Alıq sədaları ilə sənətçi ilə vidalaşan sevənləri ona incəsənət aləmindəki xidmətlərinə görə belə təşəkkür ediblər.
Aktrisanın ölümündən sarsılan millət vəkili Qənirə Paşayeva da əməkdar artistin evinin qarşısına gələrək dəfn mərasiminin bütün xərclərini Azərbaycanın birinci xanımı, Heydər Əliyev Fondunun Prezidenti Mehriban Əliyevanın öz üzərinə götürdüyünü söyləyib.
Elə sənətkarlar var ki, özləri bu dünyanı tərk etsələr də, yaşayıb yaratdıqları ilə hər zaman yaddaşda qalmağı bacarırlar. Bu gün aramızı tərk edən Xanım Qafarova kimi. Yaşatdığı kədəri oynadığı obrazların böyüklüyü ilə yüngülləşdirməyə bacaran böyük qəlbli aktrisamıza rəhmət diləyib yaxınlarına səbir arzulayırıq.
Sevda Məmmədova
Muz-Tv.az