Nilufər Gövhər Həsənzadənin mahnısını aldı

 Türkiyəli müğənni Nilufər bəstəkar Gövhər Həsənzadənin mahnısını oxuyacaq. Bu haqda  bəstəkar məlumat verib. 

    Türkiyəli müğənni Nilufər bəstəkar Gövhər Həsənzadənin mahnısını oxuyacaq. Bu haqda  bəstəkar məlumat verib. O, nəğməsinin Nilufərin yeni albomunda yer alacağını bildirib: “Bir vaxtlar İzzət Bağırovun səsləndirdiyi “Bəs mən indi neyləyim” adlı mahnımı Nilufər alıb. Bu bəstəni Türkiyədə hansı müğənniyə qulaq asdırdımsa, hamısı bəyəndi. Ən az beş məşhur ifaçı onu almaq istədi. Nəhayət, Nilufərə qismət oldu. Çünki o mənim uzun illərdir ki, dinlədiyim, sevdiyim ifaçıdır. Hər zaman arzum olub ki, bəstəmi Nilufər səsləndirsin. Mahnını necə oxuduğunu eşitməmişəm. Qarşıma şərt qoyublar ki, albom çıxana kimi ifa ilə bağlı heç bir material yayılmasın. Onlarda adət var, icazəsiz heç bir yerdə səsləndirilə bilməz. Nilufərin ifasında bəstəmi eşitməyə səbirsizlənirəm. Onun özünəməxsus oxumaq tərzi var. Bunu da fərqli ifa edəcəyini bilirəm”.

    Xalq artisti Brilliant Dadaşova özünə titul verən müğənnilərdən yazıb. İfaçı sosial şəbəkədə ona titul verən sevənlərinə belə müraciət edib: “Çox sağ olun, amma mənə titul lazım deyil. Adım mənə bəs edir – Brilliant Dadaşova. Azərbaycanın, sizin xalq artistiniz olmaq mənim üçün şərəfdir. O ki qaldı, öz-özlərinə “bir nömrə” və başqa ad yapışdıranlara... Bu, üçüncü növ müğənnilərin “kliçkası"dır”.

    Meyxanaçı Namiq Qaraçuxurlu özünü Murad Boza oxşatması ilə bağlı yayılan söz-söhbətlərə cavab verib. Əsəblərini cilovlaya bilməyən meyxanaçı tamaşaçıların onu qınadığını söyləyib: “Deyirlər, guya mən özümü “O səs Türkiyə”də münsif olan Murad Boza oxşadıram. And içirəm ki, bir dəfə də olsun, o verilişə baxmamışam. Burada özüm kimiyəm. Heç kimə bənzəməyə çalışmıram. Mən tənqidə hər zaman açıq olmuşam. Baxırlar, fikirlərini bildirirlər, amma bəzi düşüncələr yanlışdır ”.

 

Əhəd Miriyev

 

Muz-Tv.az