Firəngiz Mütəllimova: “O zəngi Yaşardan hələ də gözləyirəm”

Düz iki il aradan sonra xalq artisti Firəngiz Mütəllimova ilk dəfə olaraq Yaşar Nurinin məzarını ziyarət edib. 

     Düz iki il aradan sonra xalq artisti Firəngiz Mütəllimova ilk dəfə olaraq Yaşar Nurinin məzarını ziyarət edib. “Yaşar Nuri dünyasını dəyişəndən bu günə kimi onun məzarına getməmişdim. Ölümünə inanmırdım. Səhhətimdə ciddi problem var idi. Ağır əməliyyat keçirmişdim deyə həkimlər də icazə vermirdi. İndi yaxşıyam”. Bütün bunları sənəkar ötən gün Akademik Milli Dram Teatrında , əməkdar incəsənət xadimi İlham Rəhimlinin görkəmli teatr və kino aktyoru Yaşar Nurinin yaradıcılığına həsr olunmuş “Yaşadan əbədi Yaşar” adlı monoqrafiyanın təqdimat mərasimində bildirib. Mərasimi giriş sözü ilə teatrşünas, alim Məryəm Əlizadə açıb.Teatr Xadimləri İttifaqının sədri, rejissor Azərpaşa Nemət də sənətkar haqqında xatirələrini bölüşüb, onu “xoşbəxt aktyor” adlandırıb. Kinorejissor Eldar Quliyev aktyorun daha çox komik ampluada oynamasına baxmayaraq, dramatik aktyor kimi böyük potensialı olduğunu da vurğulayıb.Tədbirdə kitabın müəllifi İlham Rəhimli monoqrafiyanın yaranmasından danışaraq onu  2012-ci ildə, aktyorun sağlığında yazdığını söyləyib. Tədbirin sonunda Rövşən Nicatın ifasında, Ramiz Rövşənin sözlərinə yazılmış, Yaşar Nuriyə həsr olunmuş mahnının klipi təqdim olundu və imzalı kitablar qonaqlara hədiyyə olunub.

 

Sərvər Mehdiyev

Ramal Gülməmmədov

 

Muz-Tv.az