İnqrid: “Niyə də qarayanız azərbaycanlı kişisiylə ailə qurmayım?”

Ötən gün daha bir  dünya şöhrətli ulduz Bakının qonağı olub. Bu isə bir vaxtlar hər kəsin sevimlisinə çevrilmiş italyalı ifaçı İnqriddir. 

    Ötən gün daha bir  dünya şöhrətli ulduz Bakının qonağı olub. Bu isə bir vaxtlar hər kəsin sevimlisinə çevrilmiş italyalı ifaçı İnqriddir. Azərbaycan Respublikası Atçılıq Federasiyasının təşkilatçılığı ilə Bakıda keçirilən polo üzrə ikinci dünya kuboku yarışının tədbirləri çərçivəsində konsert proqramıyla çıxış edən İnqrid konsertdən əvvəl mətbuat nümayəndələrinin suallarını cavablandırıb. Konfransda daha çox zarafatlarıyla yadda qalan müğənni Azərbaycana 3-cü dəfə gəldiyini bildirib. “İstiqanlı azərbaycanlı kişilərinin arasındayam. Bakıya gələndə çox rahat oluram. Bura darıxdırıcı deyil.”

    İnqrid əvvəlki səfərlərində xalq artisti Aygün Kazımova ilə eyni səhnəni bölüşməsini də diqqətə çatdırıb. Digər dünya ulduzlarından seçilən İnqridin tamaşaçılarla səmimi ünsiyyəti də gözdən qaçmayıb. O, öz səhnəsini “Ukraynanın səsi” müsabiqəsinin iştirakçısı olan 19 yaşlı Vaqif Nağıyev ilə bölüşüb. Sənətçi həmyerlimizdən çox xoşlandığını da gizlətməyib: “Vaqif azyaşlıdır. Onu çox istəyirəm. Yaşı çox olsaydı, onunla ailə qurardım. Ümumiyyətlə, niyə də qarayanız azərbaycanlı kişisiylə ailə qurmayım?”.

    Vaqif isə öz növbəsində ifa edəcəyi duet haqqında danışıb. O, bildirib ki, “Ümid yağışı” adlanan duetin sözləri Gövhər Həsənzadəyə, musiqisi Alxanlıya, aranjimanı isə Yaşar Baxışa məxsusdur. Sonda onu da qeyd edək ki, bu ifa İnqridin gələcəkdə işıq üzü görəcək musiqi toplusunda da  yer alacaq.

 

Sərvər Mehdiyev

Bəxtiyar Nəsirov

 

Muz-Tv.az