Antonio Banderas: “Milliyətimə görə hər zaman sıxışdırılmışam”

İspaniyalı ulduz Antonio Banderas vətənində keçirilən “San Sebastian Film Festivalı”nda “Automata” filmi ilə iştirak edir.

     İspaniyalı ulduz Antonio Banderas vətənində keçirilən “San Sebastian Film Festivalı”nda “Automata” filmi ilə iştirak edir. Axşam.az-ın xarici mətbuata istinadən məlumatına görə, filmin həm qəhrəmanı, həm də rejissoru olan Banderas, müsahibəsində Hollivud haqda gözlənilməz ittihamlar irəli sürüb:“İngiliscə tələffüzümə və milliyətimə görə hər zaman Hollivudda sıxışdırılmışam. Ora artıq əvvəlki kimi deyil. Mən kino sənətini, rejissorluğu, aktyorluğu çox sevirəm. Ona görə də, xoşladığım işlə məşğul olmağa davam edəcəm. Lakin bundan sonra öz vətənimdə - İspaniyada çalışmağı düşünürəm”. Qeyd edək ki, aktyor “Automata” filmini 5 milyon avroya ərsəyə gətirib. A.Banderas layihəni 4 ilə hazırladığını bildirib.

     23 yaşında ilk “Oskar” mükafatını alan və bu il “Ginnesin rekordlar kitabı”na düşən gənc aktrisa Cennifer Lourens “Coldplay” qrupunun solisti Kris Martinlə görüntülənib.  Artıq bir aydır ki, məşhurların sevgili olması haqda şayiələr gəzirdi. Bu həftəsonu 37 yaşlı Krislə 24 yaşlı Cennifer hava limanında ilk dəfə birlikdə görüntüləniblər. Qeyd edək ki, Kris Martin hazırda Hollivud ulduzu Qvinet Peltrou ilə 10 illik evlilikdən sonra boşanma ərəfəsindədir. Krisin yeni eşqinə baxmayaraq, uşaqlarının anası ilə münasibəti çox yaxşıdır.

     Türkiyəli yumor ustası Cem Yılmaz 26-cı “Kristal Alma Yaradıcılıq Festivalı”nın bağlanış mərasimində səhnəyə çıxıb. Aktyor zarafatları ilə tədbirin qonaqlarını göz yaşlarına qərq edib. Son zamanlar qısamüddətli eşq macəraları ilə gündəmə gələn C.Yılmaz çıxışında şəxsi həyatı haqda danışıb: “İki il dayanmadan “Baby TV” kimi uşaq kanallarını izləmək anamı ağlatdı”.  Cem gecə klublarında görüntülənməsi haqda isə “Dostlarıma sevgili axtarmağa çıxmışdım, mənim başqa məqsədim yox idi”, deyə bildirib. Daha sonra isə auditoriyaya müraciət edərək "Aranızda mənə uyğun subay xanımlar varmı?” sualını səsləndirib.

    “Karadayı” serialında Fəridə obrazını canlandıran türkiyəli aktrisa Bərgüzar Korel sosial şəbəkədən tez-tez istifadə edən məşhurlardandır. B.Korelin ötən gün İnstaqramda paylaşdığı fotosu böyük marağa səbəb olub. “Səhərə qədər oyaq qalan aktrisanın seyr dəftəri” sözlərini yazan Bərgüzarın şəkli 10 dəqiqə içində 750 nəfər izləyici tərəfindən bəyənilib.

 

Əhəd Miriyev

 

Muz-Tv.az