Alim Qasımov Vyana və Meksikada konsert verəcək

Azərbaycanın Xalq Artisti Alim Qasımov Meksika və Vyanada konsert proqramları ilə çıxış edəcək. 

    Azərbaycanın Xalq Artisti Alim Qasımov Meksika və Vyanada konsert proqramları ilə çıxış edəcək. Muğam ifaçısı oktyabrın 15-də Meksikaya yola düşəcək. Meksikada dörd günlük konsert proqramı nəzərdə tutulur. Alim Qasımovun Vyana konsertləri isə oktyabrın 29-30-da olacaq. Sənətçi Vyanada qızı, Əməkdar Artist Fərqanə Qasımova ilə birgə çıxış edəcək.

   Ötən gün xalq artisti Aygün Kazımovanın qızı, gənc ifaçı İlqarə 24 yaşını qeyd edib. Özəl gününü dostları ilə keçirən İlqarə məclisinə şou-biznes nümayəndələrindən yalnız müğənni Elnur Məmmədovu dəvət edib. Maraqlı anların yaşandığı gecədə A.Kazımova qızına sürpriz hazırlayıb. Belə ki, xalq artisti övladına qırmızı rəngli avtomobil göndərib.

   Əməkdar artist Ədalət Şükürov aparıcılıq edən həmkarlarından danışıb. “Mənə də aparıcılıq təklifi olub. Amma düşünürəm ki, bunun üçün jurnalist olmalısan, universitet bitirməlisən. Hələ buna hazır deyiləm. Həm də vaxtım yoxdur. Müğənnilərin aparıcılıq qabiliyyətinə gəldikdə isə... Veriliş aparmaq üçün çox bilməlisən, danışıq qabiliyyətin olmalıdır, sualları cavablandırmalısan. Əgər həmkarlarım bunu bacarıb aparıcılıq edirsə, mənə də alqışlamaq qalır”.Ə.Şükürov Azərbaycanda konsert verməməsinin səbəbini də açıqlayıb: “Azərbaycanda təşkilatçı yoxdur. Dağıstanda, Ukraynada var. Burada təşkil etsinlər, mən də konsert verim”.

   Müğənni Röya Ayxan və Xəyyam Nisanov “Sənə ehtiyacım var” adlı mahnını duet şəklində ifa edib.Sözləri və musiqisi Murad Arifə aid olan bəstəyə sənətçilər klip də çəkdirir. Türkiyədə lentə alınan ekran işinin rejissoru Müjdat Kupsidir.  Röya və Xəyyam çəkilişdən fotoları İnstaqram səhifəsində paylaşıb. Onlar yeni ekran işinin tezliklə təqdim olunacağını vurğulayıblar.

 

Əhəd Miriyev

 

Muz-Tv.az