Faiq Ağayev : “Bir il gözləsəm, faciə olmaz”

Xalq artisti Faiq Ağayev bu il konsert verməməyinin səbəbini açıqlayıb.

    Xalq artisti Faiq Ağayev bu il konsert verməməyinin səbəbini açıqlayıb.  Axşam.az-ın məlumatına görə,müğənni gələn il mütləq bu layihəsini gerçəkləşdirəcəyini deyib:  “Başa düşdüm ki, bu il istədiyim keyfiyyəti ala bilməyəcəm. Kal, natamam iş ərsəyə gətirmək istəmədim. Mən hər şeyin əlasını, mükəmməlliyini sevirəm. Düşündüm ki, bir il gözləsəm, faciə olmaz. İstədiyim keyfiyyətdə iş ərsəyə gətirmək istəyirəm. Sənətdəki mərtəbəmi bir kənara qoyub, tamaşaçı kimi düşünürəm: mən konsertə gəlib dincəlməliyəm, mənən, ruhən, fiziki istirahət etməliyəm. On nəfər konsert keçirdi, hamısı uğurludur deyə bilmərəm”.

    Əməkdar artist Mətanət İsgəndərli yeni qərar alıb. Müğənni bundan sonra heç bir qalmaqala cavab verməyəcəyini deyib: “Bilirəm ki, insanlar söz atmaqla özlərini reklam etmək istəyirlər. İcazə verməyəcəm, buna nail olsunlar. Onlara əhəmiyyət versəm, özlərini vacib biri bilərlər. İlk növbədə əsəblərimi qoruyuram. Bəzən elə şeyə əhəmiyyət vermişəm ki, əsəblərim korlanıb, təzyiqim qalxıb. Bunlar da istəyirlər ki, mən pis hala qalım. Məni əsəbləşdirən qadın da olub, kişi də. Hirslənəndə mənə ən çox bacım Təranə tövsiyə verib, yanımda olub”.

    Əməkdar artist Manana Yeni ili səhnədə qeyd edəcək. Müğənni onun üçün ən gözəl bayramın səhnədə keçdiyini deyib: “Hər dəfə olduğu kimi, bu il də gecə saat 12-də səhnədə olacam. Müğənni üçün bundan gözəl nə ola bilər ki? İnsanlara pozitiv enerji bəxş edirsən. Bütün ilin pozitiv keçir. Bayram vaxtı harasa istirahətə getməyəcəm. Çünki işlərim çoxdur. Studiyada mahnılar var, onları yazdırmalıyam”. Solo konsert vermək istədiyini deyən Manana bunu 2015-ci ildə gerçəkləşdirəcək: “Bu il planımda solo konsert var idi. Amma oğlum dünyaya gəldiyi üçün alınmadı. Yeni ildə mütləq olacaq. Bunun üçün mənə maddi dəstək də lazımdır”.

   Əməkdar artist Elza Seyidcahan qızı və gəlini ilə yeni fotolarını sosial şəbəkədə paylaşıb. Məclislərin birində lentə alınan şəkillərdə müğənninin gəlininin qucağındakı uşaq diqqət çəkib. E.Seyidcahan nəvəsi olması ilə bağlı söz-söhbətlərə cavab verib:

“Hamı elə bilir ki, nəvəm olub. O uşaq rəfiqəmin nəvəsidir. Həmin körpə doğulanda onu ilk mənim qucağıma verdilər. Adı Nuraydır. Mən də tezliklə nənə olmaq istəyirəm. Gənc nənə olmaq gözəldir”.

   Müğənni İradə İbrahimli qardaş ölkədə “O səs Türkiyə” yarışmasında böyük səs-küy yaradan Elnur Hüseynovla bağlı danışıb: “Elnur bu gün türklər üçün çox maraqlı insandır. Gündəmdədir, aktualdır. İstifadə edəcəklər, sonra kənara atacaqlar. Ağılları olsa, atmazlar. Gözəl səsi var deyə, o ora çəkir, bu bura. Elnurun o müsabiqəyə çıxmağı onlar üçün reklamdır. Çünki Elnur münsiflərin arasında otura biləcək müğənnidir. Elnur ora adi bir ifaçı kimi getdi deyə onu qəbul etdilər. Əgər əlində albomu ilə getsəydi, ona bu qədər diqqət göstərməzdilər”.

 

Əhəd Miriyev

 

Muz-Tv.az