Faiq Ağayevin ən vacib təbriki
Xalq artisti Faiq Ağayev ad günündə gözlədiyi önəmli zəngi alıb...
Xalq artisti Faiq Ağayev ad günündə gözlədiyi önəmli zəngi alıb. “Ən vacib təbrikimi gecə saat 02:15-də aldım. Anam zəng etdi. Məhz həmin saatda anadan olmuşam. Hər yeni yaşım, yeni ilim mənim üçün bu həyatda yenə də oxumaq üçün şansdır. Həm hərfi, həm də məcazi mənada: həm mahnı oxumaq, həm də həyatda nəyisə örənmək baxımından”.
Əməkdar artist Nüşabə Ələsgərli şəxsi həyatı ilə bağlı etiraf edib. Müğənni 23-24 yaşında həyatında dəli bir sevgi yaşadığını deyib: “Əgər 20 il əvvəl məndən o sevgimi soruşsaydılar, başqa cür danışardım. İndi böyük oğlum və qızım var. Qəlbimin dərinliyindəki o sözləri başqa cür deməliyəm. Mən oğluma, qızıma örnəyəm. Sevgi xəstəliyə bənzədilir. Övladlarıma tövsiyə edirəm ki, ağılla sevin. Ağılla sevəndə uğur qazanırsan. Ürəyə həvalə edəndə isə yaxşı olmur”.
Müğənni Röya Ayxan yeni albom buraxacaq. Sənətçi yeni diskinin Türkiyədə işıq üzü görəcəyini deyib: “Altı aydan sonra növbəti konsertimi verəcəm. O vaxta qədər isə Türkiyədəki layihələrimi gerçəkləşdirəcəm. Yeni ildən sonra İstanbula gedirəm. Mənə 2 ay vaxt lazımdır. Bu dəfə sinql çıxarmıram. CD formasında səkkiz-on mahnıdan ibarət albom olmalıdır. Axırıncı bəstəni gözləyirəm, aranjimandadır. Mustafa Ceceliyə həvalə olunub. O da yeni disk buraxdığı üçün çox tələsdirə bilmirəm. İstəyirəm bahalı iş ortaya çıxsın. “Xəyanət” mahnısına çəkilən yeni klipim isə yanvarın 25-26-da təqdim olunacaq. Ekran işinin rejissoru Müjdat Kupsidir”.
Müğənni Elnur Məmmədov onun adına açılan “fan səhifə”lərdən bezdiyini söyləyib: "Məndən icazə almadan tanımadığım insanlar tərəfindən “fan səhifə”lər açılır. “Fan səhifə”ni bildiyin insan açar. Bunlar isə antireklam edirlər. Mənə bunlar lazımdır? “Facebook”, İnstaqram səhifəmi bir pərəstişkarım idarə edir. Amma indi görürəm ki, kim ağlına gəldi özbaşına səhifə açır. Mən həyatım boyu qürurumu qoruyub saxlayan bir insan olmuşam. Həmişə doğru-dürüst xəbərlər çatdırmışam. Amma istəmərəm ki, kimsə ağlına gələn hər hansı xəbəri yazsın və sevənlərimdə haqqımda başqa fikir formalaşdırsın”.
Əhəd Miriyev
Muz-Tv.az