Hollivud ulduzları daha bir körpəni övladlığa götürmək istəyirlər

Aktrisa Ancelina Coli və həyat yoldaşı, aktyor Bred Pit daha bir uşağı övladlığa götürmək istəyirlər.

   Aktrisa Ancelina Coli və həyat yoldaşı, aktyor Bred Pit daha bir uşağı övladlığa götürmək istəyirlər. Axşam.az-ın Rusiya mediasına istinadən xəbərinə görə, məşhur cütlük türk qaçqınlarının düşərgəsindəki iki yaşlı Mussa adlı oğlanı övladlığa götürmək fikrindədir. 39 yaşlı aktrisa BMT-nin xoşməramlı səfiri kimi qaçqın düşərgələrini ziyarət edərkən Mussanın ağır həyatından təsirləndikdən sonra bu qərara gəlib. Həmin an Colinin yanında olanlar deyir ki, balaca oğlan aktrisanın ağladığını görüncə onu qucaqlayıb: "Bu çox təsirli səhnə idi. Ancelina görüşün sonuna qədər Mussadan ayrılmadı".
   Xərçəng xəstəliyi ilə mübarizə aparan türkiyəli müğənni-bəstəkar Kayahan Sevgililər günündə tamaşaçıların qarşısına çıxacaq. Sənətçi artıq 14 fevral üçün konsert hazırlıqlarına başlayıb. Həmkarı Nilufərlə illər sonra eyni səhnəni paylaşacaq Kayahan imicində də dəyişiklik edib.
   Amerikalı tok-şou aparıcısı Ellen DeCeneres verilişinə dəvət etdiyi kanadalı müğənni Castin Biberlə tamaşaçılara sürpriz hazırlayıb. Gizli çəkilişin aparıldığı tualetdə pop ulduzla öpüşürmüş kimi dayanan Ellen içəri girənlərin böyük təəccübünə səbəb olub. Bu zarafatın iştirakçılarının əksəriyyəti oradan qaçsa da, çoxu C.Biberi gördükdə həyəcanını gizlədə bilməyib.DeCeneresin hazırladığı həmin görüntülər internetdə izlənilmə rekordu qıran videolar sırasına daxil olub.
    Qremmi-2015 mükafatlarının qalibi müğənni Sem Smit "Rolling Stone" jurnalına müsahibəsində Rusiyaya heç vaxt getməyəcəyini bildirib. O, bunu ordakı diskriminasiya ilə əlaqələndirib: "Mənim Rusiyaya bir ölkə kimi nifrətim yoxdur, amma heç vaxt Rusiyaya gedib orda konsert vermərəm. Çünki orda insanları cinsi orientasiyasına görə fərqləndirirlər. Qeyri-ənənəvi orientasiyalı insanlara qarşı münasibətləri dəhşətlidir. Bu məni qəzəbləndirir. Əgər mənə hətta milyard dollar təklif etsələr, Rusiyada çıxış etmərəm. Özümü buna məcbur edə bilmərəm. Çoxlu rus fanatlarım var, amma onlarla yeganə əlaqəm Tvitterdə ola bilər".

 

Əhəd Miriyev

 

Muz-Tv.az