Röya Ayxan: “Hüseyn mənə oxumağı öyrədir”

Müğənni Röya Ayxan yeni mahnısını oxumaq üçün studiyaya bu dəfə oğlu Hüseynlə yollanıb. 

    Müğənni Röya Ayxan yeni mahnısını oxumaq üçün studiyaya bu dəfə oğlu Hüseynlə yollanıb. Axşam.az-ın məlumatına görə, sənətçi övladı ilə çəkdirdiyi videonu sosial şəbəkədə paylaşıb. Rus dilində olan mahnının sözünü düzgün tələffüz etməyən Röyaya oğlu kömək olub. O, videoya “Ölmədim, bu günü də gördüm. Hüseyn mənə oxumağı öyrədir” şərhini yazıb.

    Müğənni Günay İbrahimli solo konsertinin hazırlıqlarına başlayıb. Bu haqda sənətçinin prodüseri Toma Hüseynəliyeva xəbər verib. O, konsertin yazda Heydər Əliyev Sarayında baş tutacağını bildirib: “İndi geyimlər üzərində çalışırıq. Üç libas olacaq. Biri Türkiyədə hazırlanır. İlk konsertdə Günay açıq-saçıq libaslarda çıxmışdı. Bu dəfə fərqli paltarlar düşünmüşük. Modelləri özümüzə məxsusdur”.

    Müğənni İlhamə Qasımova toylara getməməyinin səbəbini açıqlayıb: “Toy mahnısı oxumuram. Mənim tərzimdəki musiqilər isə məclislərə uyğun deyil. Əvvəllər az da olsa gedirdim. Toy sahibinə o qədər sual verirəm ki... Məclisdə mənim təhlükəsizliyim qorunmalıdır. Oxuduğun yerdə içkili biri gəlir, dava salır, söz deyir. Əgər ev yiyəsi məni qorumursa, gərək toya özümlə cangüdən aparım. Onda da beş qat artıq qonorar istəməliyəm”.

    Müğənni Aysel Əlizadə Türkiyədə çəkdirdiyi “Geri dönsən” klipini təqdim edib. Sözləri Leyliyə, musiqisi İlkin Həsəniyə məxsus olan bəstənin ekran həllinin rejissoru Onur Aldoğandır. Çəkilişlər Türkiyənin məşhur serialları - “Karadayı”, “Zaman elə keçir ki..."nin lentə alındığı pavilyonda baş tutub. "Geri dönsən"in meneceri Ləğman Tağıyevadır. Aysel Əlizadə klipdə bir neçə fərqli libasda və saç düzümündə təqdim edilib.

 

Əhəd Miriyev

 

Muz-Tv.az