Bu gün Yel çərşənbəsidir

Bu gün Yel çərşənbəsidir. El arasında bu çərşənbəyə "küləkli çərşənbə", "külək oyadan çərşənbə", "yelli çərşənbə" də deyilir. 

    Bu gün Yel çərşənbəsidir. El arasında bu çərşənbəyə "küləkli çərşənbə", "külək oyadan çərşənbə", "yelli çərşənbə" də deyilir. Qədim etiqadlarda qeyd edilib ki, torpağın altında - "qara nehrdə" yatmış dörd cür külək yer üzərinə çıxaraq müxtəlif libaslarda özünü göstərir. Mifologiyamızda ağ yel - ağ, qara yel - qara, xəzri - göy, gilavar - qırmızı libasda təsvir edilir. Yel çərşənbəsi günü yel bu dörd yellə birləşib dünyanı dolaşır, gəzib oyanmış suyu, odu hərəkətə gətirərək yazın gəlişindən xəbər verir.

İnanclara görə, Yel çərşənbəsinin gətirdiyi isti küləklər yazın gəlişini yaxınlaşdırır, təbiəti isindirir. Yel çərşənbəsində gecə söyüd ağacının altına gedib niyyət edib Yel babanı çağırmalısan. Əgər Yel baba sənin səsini eşidib əssə və söyüdün budaqları tərpənsə, diləyin yerinə yetər. Yel xalqımızın mifik təfəkküründə yol göstərən bələdçi rolunu da oynayır. Yel çərşənbəsi həm də ilaxır çərşənbəyə hazırlıq deməkdir.

    Yel çərşənbəsi günü tonqallar qalanır, evlərdə südlü plov və ya bulğur aşı bişirilir. Süfrəyə daha çox quru meyvə və dənli bitkilərdən hazırlanmış çərəzlər düzülür. Qadınlar axır çərşənbə üçün hazırlıqlar görürlər. Bu gün bir qarış böyümüş səməninin ortasına qırmızı qumaş bağlanır.

 

Sevda Məmmədova

 

Muz-Tv.az