Elza Seyidcahan: “Hamı aktyorları bağışlamağımı istədi”
Əməkdar artist Elza Seyidcahan küsülü olduğu “Bu şəhərdə”nin Heydər Əliyev Sarayında baş tutan "Göz-Əl" konsertinə yollanıb.
Əməkdar artist Elza Seyidcahan küsülü olduğu “Bu şəhərdə”nin Heydər Əliyev Sarayında baş tutan "Göz-Əl" konsertinə yollanıb. Axşam.az-ın məlumatına görə,müğənni onu icazəsiz parodiya edən aktyorları məhkəməyə vermək fikrindən daşındığını deyib: “Tamaşa başlamazdan əvvəl Rafael İsgəndərov mənə yaxınlaşdı, halallıq istədi. Söhbət etdik, barışdıq. Hamısını bağışladım. Onları məhkəməyə verəcəyimi deyəndən sonra çox insanlar zəng etdi, mesaj yazdı. Hamı aktyorları bağışlamağımı istədi. “Bu şəhərdə”ni xalq sevir. Hətta nə qədər insan mənə görə bilet alıb, tamaşaya gedib ki, həmin səhnəni görsün. Coşqunu da, Rafaeli də çox istəyirəm. Konsertə gedəndə maraqlı saç düzümü etmişdim, tac taxmışdım. Bütün diqqətlər üzərimdə idi. Bundan sonra parodiya etsələr də, heç nə deməyəcəm. Onların işi məşhurları yamsılamaqdır, nə etmək olar?”.
Müğənni Röya Ayxan bir zamanlar üzvü olduğu “W-trio” qrupun solistləri ilə konsert vermək istəyir. Sənətçi bu haqqda açıqlamasında bildirib: “W-trio” yenidən bir araya gələ bilər, bu mümkünsüz deyil. Mən həmişə onlarla birləşib, nəsə etmək istəmişəm. Bir dəfə də onlar addım atsınlar. Adam paxıl olmaz”. “Mən onlara qarşı addım atdım. Qızlardan cavab gəlmədi. Bir dəfə zəng edib desinlər ki, Röya belə layihə var, bunu gerçəkləşdirək. Beyons da qrupdan çıxıb. Tez-tez qızları başına yığıb, konsert verir. Hərə öz yerini bilsə, gözəl olar”.
Müğənni Rəqsanə İsmayılova türkiyəli məşhurlar Hülya Avşar, Gülbən Ərgən, Hadisə və Demet Akalınla bir araya gələcək. O, Türkiyədə “Qadına şiddətə yox!” adlı aksiya keçirməyə hazırlaşır. Sənətçi açıqlamasında bunları bildirib: “Türkiyədə Şiddət Görən Qadınlar Qurumuna üzv olmuşam. Onlarla birlikdə konsert keçirəcəm. Həmin konsert bir müddət əvvəl Türkiyədə təcavüzə uğrayan və vəhşicəsinə öldürülən Özgəcanın xatirəsinə həsr olunacaq. Konsert zamanı Azərbaycanın qədim tarixini əks etdirən aksessuarların satışını təşkil edəcəm. Buradan çoxlu əşyalar almışam. Heç birinə qiymət qoymayacam. Kimin gücü nəyə çatsa, o qədər də ödəyib, əşyanı ala biləcək. Əldə edəcəyim gəliri də həmin quruma bağışlayacam. Konsertdə Türkiyənin məşhur “MB orkestrı” ilə çıxış edəcəm. Bu ayın sonunda baş tutacaq gecədə Hülya Avşar, Hadisə, Demet Akalın, Gülbən Ərgən də oxuyacaq. Onlarla danışıqlar aparılıb, razılıqları alınıb. Türkiyədə məşhurlar şiddətə qarşı olan tədbirlərdə tez-tez çıxış edirlər, bizimkilər kimi "vaxtım yoxdur" deyib qaçmırlar”.
Müğənni Ayan Babakişiyeva ikinci dəfə ailə qurmaq istəyir. Sənətçi xəyalındakı gəlinlikdən danışıb: “Hər bir gənc xanım ömür-gün yoldaşı, ona dayaq olacaq kişi arzulayır. Heç bir qadın istəməz ki, ərə gedəndən sonra boşansın. Uşaq qalır ortada, psixoloji zərbə alır. Boşansan belə, əgər gəncsənsə, ailə istəyəcəksən. Eləcə də mən... İkinci dəfə ailə qurmağa normal baxıram. Gözəl, qeyri-adi bir gəlinlik xəyal edirəm. Böyük, uzun şleyfli libasları sevmirəm. Sadəliklə də fərqlənmək mükündür”.
Əhəd Miriyev
Muz-Tv.az