Elnur Hüseynov Azərbaycanı "Eurovision"- da bu mahnı ilə təmsil edəcək

Azərbaycanı bu il "Eurovision" Mahnı Müsabiqəsində təmsil edəcək olan müğənni artıq bəlli olub.

     Azərbaycanı bu il "Eurovision" Mahnı Müsabiqəsində təmsil edəcək olan müğənni artıq bəlli olub. Axşam.az-ın məlumatına görə, dünyanın ən məşhur mahnı yarışmasında ölkəmizi Elnur Hüseynov təmsil edəcək. O, mistik və müasir ballada “Hour of the Wolf” mahnısını səsləndirəcək.  Təəssüratlarını bölüşən E.Hüseynov bunları deyib: “Eurovision 2015" özümü bir solo ifaçı kimi təsdiq etməyim üçün böyük şansdır. Mahnıma güvənirəm, çünki onun çox güclü ismarışları var. Bu, həqiqətən də böyük mənası olan bir mahnıdır. Ən önəmlisi “bir savaşa layiqdir ürək” mesajıdır. Biz heç vaxt təslim olmamalıyıq. Öz xoşbəxtliyimiz və daha yaxşı gələcəyimiz üçün daim savaşmalıyıq. "Eurovision"a bu ismarışı avropalılarla paylaşmaq üçün gedirəm”. Qeyd edək ki, 2015-ci il fevralın 18-də Elnur “O səs Türkiyə”nin qalibi olub.  O, mayın 21-də "Eurovision"ın ikinci yarımfinalında çıxış edəcək.

    Müğənni Röya Ayxan sənət dostlarını bir araya yığıb, klip çəkdirəcək. Bu haqda ifaçı açıqlamasında bildirib: “Ağlımıza gəldi, etməyə qərar verdik. Hazır olun, mənim sevimli sənət dostlarım. Hamınızı böyük layihədə bir yerdə görmək xoş olacaq. Belə bir klip 2007-ci ildə Kənan M.M-lə çəkmişdik. Tunarla mənim duetimin ekran işində". Qeyd edək ki, “Həsrət nəğməsi” klipində əməkdar artist Abbas Bağırov, İlqar Muradov, Lalə Məmmədova, müğənni ABD Malik, Elmir, rejissor Ülviyyə Könül və Şahin Zəkizadə rol almışdı.

     Müğənni Elnarə Xəlilova Türkiyədə "Enbe" orkestri ilə birlikdə konsert verəcək. "TRT Avaz"ın təşkil etdiyi musiqi axşamı Novruz bayramına  həsr olunub. İki saat davam edəcək konsert martın 21-də sözügedən telekanalda canlı yayımlanacaq. E.Xəlilova konsetdə xalq və klassik Azərbaycan mahnıları səsləndirəcək. O, səhnəni türkiyəli ifaçı Kubatla bölüşəcək. Gecədə hər iki ifaçının tamaşaçılara sürprizi olacaq.

     Müğənni Aysel Əlizadə retro stildə olan yeni fotosessiyasını tamaşaçıların ixtiyarına verib. Konsertə hazırlaşan sənətçi repertuarında da dəyişiklik edəcək. Belə ki, türkiyəli müğənni Murad Dalkılıçla eyni səhnəni bölüşəcək A.Əlizadə tamaşaçılar üçün maraqlı proqram hazırlayıb. Sənətçi  “Yeni dünya” mahnısını g-funk janrında yazdırıb. Bəstənin musiqisi İslam Şirvani, sözləri Albay Əfəndiyə məxsusdur. O, ilk dəfə bu janrda mahnı səsləndirəcəyini bildirib. Nahid Emiloğlunun təşkilatçılığı ilə martın 23-də məkankların birində baş tutacaq gecədə hər iki ifaçı duet oxuyacaq.

 

Əhəd Miriyev

 

Muz-Tv.az