Aygün Kazımova və Nikolay Baskov arasında qalmaqal

Xalq artisti Aygün Kazımova rusiyalı müğənni Nikolay Baskovla qalmaqal yaşayıb. 

      Xalq artisti Aygün Kazımova rusiyalı müğənni Nikolay Baskovla qalmaqal yaşayıb. Axşam.az-ın məlumatına görə, müğənni səhnədə onun adını səhv deyib: "Moskvada tədbirdəydik, aparıcı Nikolay Baskov, əsas müğənni isə Xəyyam Nisanov idi. Xəyyam ilk mahnıdan sonra onu dəvət etdi. On dəqiqə gecikdi, çıxdı səhnəyə günahını Xəyyamın üstünə atdı: "Sən heç oxumursan". Mən də bunu yadımda saxladım. Nikolay məni dəvət etdi, çıxdım oxudum. Başladım ki, indi isə Mixayıl Baskovu dəvət edirəm. Nikolay gəldi, əsəbi halda: "Mən Mixayıl deyiləm". Dedim: "Canım, Allahına şükür et ki, sənə Filipp deməmişəm". Onların da arasında qalmaqal var. O, daha da əsəbiləşdi: "Onda siz heç Moskvaya gəlib çıxa bilməzdiniz".

     Əməkdar artist Elza Seyidcahan iki müğənnini məhkəməyə verib. İfaçı bu haqda açıqlamasında deyib: "İki müğənni var: birini polisə şikayət etmişəm, digərini məhkəməyə vermişəm. Biri qızdır, digəri oğlan. Onlara sənətçi belə deməzdim. Müğənni olmaq istəyirlər. Mənim ünvanıma təhqiramiz sözlər yazıblar. Belə insanlar ailə tərbiyəsi görməyiblər. Mənim uşaqlarım özündən böyük birini təhqir etsə, onları övladlıqdan çıxardaram. Həmin insanların adlarını çəksəm, onlar üçün şərəf olar. Belələri Elza Seyidcahanın, əməkdar və xalq artistlərinin adını çəkəndə "Bismillahir" deməlidirlər".

     Müğənni Xumar Qədimova açıq-saçıq geyimlərdən danışıb. İfaçı açıqlamasında səhnədə geyimi ilə yox, sənətiylə diqqət çəkdiyini bildirib: "Müğənni qısa da, uzun da geyinə bilər. Əsas odur ki, estetik cəhətdən eybəcər görünməsin. Gərək müğənninin geyimi yox, sənəti öndə olsun. Tam açıq-saçıq libas qadını adiləşdirir. Açıq geyinə bilərsən, amma estetik görünüşü zədələməmək şərtiylə. Xumar cazibədar qadındır".

     Müğənni Sevinc Musayeva Novruz bayramı ərəfəsində İzmirdə konsert verib. Təəssüratlarını bölüşən sənətçi 700 insan qarşısında çıxış edib: "Novruz bayramı ərəfəsində Diasporla İş üzrə Dövlət Komitəsinin dəstəyi ilə İzmirdə konsert keçirilib. Mərasimdə Azərbaycandan yeganə ifaçı mən idim. Oradakı həmvətənlərimiz və yerli insanlar üçün mahnılar səsləndirdim, Novruz ənənələri ilə bağlı məlumat verdim. İlk dəfə idi İzmirə gedirdim. Şəhərə, Egey dənizinə heyran qaldım. Bayram günü ailəmdən uzaq olsam da, gözəl insanların əhatəsində idim. İzmirin sayılıb-seçilən insanları ilə tanış oldum. Hətta daha bir konsert üçün dəvət aldım".

 

Əhəd Miriyev

 

Muz-Tv.az