“Leyli və Məcnun” operasının audio variantı işıq üzü görəcək

Üzeyir Hacıbəyovun “Leyli və Məcnun” operasının ilk dəfə olaraq audio variantı işıq üzü görəcək.  

     Üzeyir Hacıbəyovun “Leyli və Məcnun” operasının ilk dəfə olaraq audio variantı işıq üzü görəcək. Xalq artisti Aygün Bayramova bildirib ki, səsyazma studiyasında lentə alınan operanın səsləndirilməsində Üzeyir Hacıbəyov adına Dövlət Simfonik Orkestri də iştirak edib. Xanəndənin tərəf müqabili isə xalq artisti Mənsum İbrahimov olub. Sənətçinin sözlərinə görə, operanın ifasında bütün heyət iştirak edib: “Yaxın zamanlarda kompakt disk işıq üzü görəcək. Daha əvvəl opera DVD şəklində bir neçə dəfə çıxarılsa da, lakin ilk dəfədir ki, audio forması olacaq”.
     Albom üzərində çalışdığını deyən xalq artisti istilər səbəbindən işlərinin yarımçıq qaldığını vurğulayıb. “Leyli və Məcnun” operasında Mənsum İbrahimovun tərəf müqabili kimi tanıdığımız xalq artisti Nəzakət Teymurova ilə yanaşı, Aygün Bayramova özünün də Leyli kimi sevildiyinə şübhə etmir : “Səhnə elə bir yerdir ki, orda tutub qalmırsan. Əsas odur ki, tamaşaçının sevgisini qazanasan. Tamaşaçı məni Leyli kimi qəbul edib və sevir”.
      Konsertlə bağlı da danışan Aygün Bayramova onun payız aylarında keçiriləcəyini vurğulayıb. Qastrol səfərinə də hazırlaşdığını qeyd edən xalq artisti ABŞ -a dəvət aldığını və yay bitdikdən sonra bu ölkəyə səfər edəcəyini də istisna etməyib.

Çinarə Nurməmmədova
Rüfət Qarayev

Muz-Tv.az