“Fatimə ilə duetim alınmadı, çünki ...”

Dünya rəqslərinin mahir ifaçısı İlham Kərimli qrupu ilə birgə Azərbaycan və kürd ritmlərinin qarışığından ibarət yeni müasir...  

    Dünya rəqslərinin mahir ifaçısı İlham Kərimli qrupu ilə birgə Azərbaycan və kürd ritmlərinin qarışığından ibarət yeni müasir formada “Yallı” rəqsini tezliklə tamaşaçıların ixtiyarına verəcək. Onun sözlərinə görə, həmin rəqsin geyimi də bir neçə günə hazır olacaq. Qrupla yanaşı İlham Kərimlinin solo rəqsi də hazırlanır. Fatimə ilə klassik hind rəqsini duet şəklində ifa etməyi nəzərdə tutsa da, rəqqasın işlərinin çoxluğu buna mane olub. Musiqidə sintezə üstünlük verən İlham, rəqslərində də bu ideyadan istifadə edəcəyini bildirib: “Step ilə Azərbaycanın milli rəqsini sintez etməyi düşünürəm və məncə bu tamaşaçılar tərəfindən də maraqla qarşılanar”.
    Müxtəlif rəqslərə quruluş verən İlham onun yaratdığı ideyaların oğurlanması ilə fəxr hissi duysa da, təəssüfləndirən məqamların da olduğunu vurğulayıb: “Çox olub ki, mənim rəqslərimi oğurlayıblar. Buna əsəbləşsəm də, həmin insanların özləri ilə əlaqə saxlayıb bildirmişəm ki, ya kimə məxsus olduğunu qeyd edin, ya da özününküləşdirməyin”.
    Rəqqas klip çəkdirməyə müsbət yanaşsa da, hələ ki, bu fikirdə deyil.

Səbinə Zöhrabqızı
Ramal Gülməmmədov

Muz-Tv.az