Madonna müsəlmansayağı toy paltarı geyinmək istəyir

Türkiyəli müğənni Fərhat Göçer “Yanına kalmaz” adlı mahnısına çəkdirdiyi klipini sevənlərinin ixtiyarına verib.  

   Türkiyəli müğənni Fərhat Göçer “Yanına kalmaz” adlı mahnısına çəkdirdiyi klipini sevənlərinin ixtiyarına verib. Onu bu ekran işində modellər Anastasiya Beloborodova və Çağdaş Üçüncü müşayət edib. Tərk edilmiş adamın duyğularından bəhs edən klip təxminən 24 saat ərzində çəkilib. Xatırladaq ki, müğənni bu vizual əsərini azərbaycanlı rejissor Əmir Xəlilzadəyə həvalə edib. 
   Amerikalı müğənni Nikol Şerzinger bulimiya xəstəliyi ilə mübarizə apardığını etiraf edib. 34 yaşlı ulduz əvvəllər özünə nifrət etdiyini və çox tənha qaldığını, buna görə də bu dəhşətli xəstəliyə düçar olduğunu bildirib. Müalicəsi davam edən Nikol hazırda özünü yaxşı hiss etdiyini qeyd etməyi də unutmayıb.
   Müğənni Kənan Doğulu ilə ailə qurmağa hazırlaşan aktrisa Beren Saat bir alış-veriş mərkəzində evinin dizaynı üçün pərdə seçərkən jurnalistlərə yaxalanıb. Barmaqlarındakı üzükləri göstərə-göstərə yeriyən ulduzun kefinin yaxşı olduğu diqqətlərdən qaçmayıb. Aktrisa evlilik barədə suallara gülümsəyərək cavab verməyib.
   Müğənni Madonna “Superstar” mahnısına çəkdirdiyi yeni klipində ənənəvi İraq toy fatası ilə amerikan əsgər geyiminin birləşməsindən hazırlanmış “Terrorun gəlini” adlı paltarla kamera qarşısına keçməyi planlaşdırıb. Bununla ulduz müharibəyə və qadınlara qarşı zülmə etirazını nümayiş etdirmək istəyib. Amma sənətçinin məsləhətçiləri ona müsəlman paltarı geyinməyin ölkələrarası siyasi böhrana gətirib çıxaracağı barədə xəbərdarlıq edib. Məlumata görə, Madonna yalnız həyati təhlükəsinin olduğunu bildikdən sonra bu fikrindən daşınmaq qərarına gəlib.

 

Sahilə Aslanova

 

Muz–Tv.az