Şakira konsert zamanı gələcək körpəsindən bəhs etdi

Qonaqlı şəhərimizin növbəti ulduzu dünya şöhrətli müğənni Şakira olub.  

     Qonaqlı şəhərimizin növbəti ulduzu dünya şöhrətli müğənni Şakira olub. Hamiləliyinin altıncı ayında olan ifaçı ilk olaraq Tofiq Bəhramov adına stadionda 17 yaşadək qadınlararası dünya çempionatının bağlanış mərasimində çıxış edib. Bundan əlavə UNICEF-in xoşməramlı səfiri Şakira 17 yaşınadək oyunçulardan ibarət futbol liqasının bir qrup yeniyetmə qızları ilə də görüşüb. Görüş zamanı bu sahədə təhsilin əhəmiyyəti və onun qızların inkişafına verəcəyi tövhə müzakirə edilib.
     Bir gün sonra isə kolumbiyalı müğənni “Avroviziya-2012” mahnı müsabiqəsinin keçirildiyi “Bakı Kristal Zal”ın möhtəşəm səhnəsində geniş konsert proqramı ilə sevənlərinin görüşünə gəlib. İfaları ilə yanaşı, ərəb və latın milli rəqsləri ilə dinləyicilərin rəğbətini qazanan tanınmış müğənni bu dəfə məlum səbəbdən ənənəsinə sadiq qala bilməyib. Buna baxmayaraq o, Bakı tamaşaçıları qarşısında bir saatlıq şou ilə çıxış etməyə nail olub. Dünyaya gələcək uşağından danışan ana: “Mən körpəmlə ilk dəfədir səhnəyə çıxıram. Bizim üçün çox yaxşıdır və balacamın mənimlə birlikdə oxuduğunu, rəsq etdiyini hiss edirəm” -deyib.
     Konsertdə baş verən bir hadisə Bakı sakinlərinin narazılığına səbəb olub. Belə ki, Kolumbiya bayrağını göyə qaldırmaq istəyən müğənni onu tərsinə tutub və bu böyük qalmaqala səbəb olub. Diqqətinizə çatdıraq ki, Komumbiya bayrağı tərsinə tutulduqda Ermənistan bayrağına çevrilir.
     Xatırladaq ki, bir müddət öncə Şakiranın Bakı konsertinin təxirə salınacağı deyilsə də, o, özünün “Facebook fanpage”ində yerləşdirdiyi video-çarxda Azərbaycana gələcəyini söyləyib. Həmçinin ulduz vurğulayıb ki, bütün çıxışlarını təxirə salsa da, Bakıda konsert vermək təklifinə etiraz etməyib.

Səbinə Zöhrabqızı

 

Muz-Tv.az