Zülfiyyə Xanbabayeva 45 yaşını qeyd edir

Xalq artisti Zülfiyyə Xanababayeva 16 oktyabr 1967-ci ildə dünyaya gəlib.  

   Xalq artisti Zülfiyyə Xanababayeva 16 oktyabr 1967-ci ildə dünyaya gəlib. Musiqini, ədəbiyyatı çox sevən ifaçı Əfsər Cavanşirovun xorunda oxumağa başlayıb. 12 yaşlı Xanbabayeva Üzeyir Hacıbəyovun ev muzeyində Füzulinin "Şəbi-Hicran" şeirini səslənirəndə ilk dəfə qəzetlər ondan yazıb. Məktəbdə oxuduğu zaman Cəfər Cabbarlının eyni adlı əsərində Sevil rolunu oynamaqla o, özünü aktrisa kimi sınayıb. Atasının Zülfiyyəni Xarici Dillər Universitetinin tələbəsi kimi görmək arzusuna baxmayaraq, o İncəsənət Universitetinin "Teatr rejissorluğu" fakültəsinə daxil olub.
  1989-ci ildə "Bakı Payızı-88" müsabiqəsində iştirak edən Zülfiyyə xanım Vaqif Gərayzadənin "Səni xatırlayarkən" mahnısını ifa edib və finala çıxıb. 1994-cü ildə bəstəkarın “Aypara” qrupunda yer alan müğənni daha sonra solo ifa etməyə başlayıb.
   Bu günə kimi 5 albomu işıq üzü görən xalq artistinin çoxlu sayda populyar mahnıları var və bu ifalar hələ də onu sevənlərin qəlbində yaşayır. “Demirəm”, “Gecikməyin sevməyə”, “Sən gedən gündən”, “Son gecə”, “Azərbaycan”, “Səninlə”, “Unut getsin”, “Nə faydası” və digər əsərləri müğənninin repertuarında əvəzsiz izlər qoyub.
   Xalq artisti Zülfiyyə Xanbabayevanın ilk evliliyi Aydın adlı şəxslə olub. Amma bir müddət sonra bu nikaha son qoyan müğənni ikinci dəfə “Simurq” futbol klubunun prezidenti Zaur Məmmədovla ailə qurub. Hazırda davam edən bu evlilikdən sənətçinin Dəniz adlı bir qızı var. Xatırladaq ki, ifaçının sol albomunu onun yeganə övladının adı ilə bağlıdır.
   Qeyd edək ki, Zülfiyyə Xanbabayeva 2003-cü ildə əməkdar artist, 2008-ci ildə isə xalq artisti fəxri adına layiq görülüb.

Səbinə Zöhrabqızı

 

Muz-Tv.az