Xalq artisti Habil Əliyevin 85 illik yubileyi qeyd olundu

Müslüm Maqomayev adına Azərbaycan Dövlət Filarmoniyasında “Şöhrət” və “İstiqlal” ordenli xalq artisti, görkəmli kamança ustası Habil Əliyevin 85 illik yubileyi keçirildi. 

      Müslüm Maqomayev adına Azərbaycan Dövlət Filarmoniyasında “Şöhrət” və “İstiqlal” ordenli xalq artisti, görkəmli kamança ustası Habil Əliyevin 85 illik yubileyi keçirildi.
     Mədəniyyət və Turizm nazirinin müavini Ədalət Vəliyev, eləcə də bir çox incəsənət xadimlərinin qatıldığı tədbir görkəmli ədəbiyyatşünas Rafael Hüseynovun aparıcılığı ilə davam edib. Habil Əliyevin ifasını nə özündən əvvəlkilərə, nə də sonrakılara bənzətməyən aparıcı sənətkarın həyat və yaradıcılığından bəhs edən qısa video çarxı qonaqlara nümayiş etdirib. Gecədə səbəbkarı musiqinin dili ilə təbrik edənlər də olub. 
      Bu əziz günündə ustada öz xoş arzularını çatdıranlar arasında xalq artistləri İlhamə Quliyeva, Ağaxan Abdullayev, Aygün Bayramova da olub. Tədbirdə çalğısı ilə sözü və ruhu dəyişən sənətkarı təbrik etmək üçün Güney Azərbaycandan gələnlər də olub. Bəzisi sənətkara həsr etdiyi şeiri səsləndirdiyi halda, bəzisi ney ifa etməklə təbrikə qoşulub. Qeyd edək ki, Habil Əliyevin yubileyinin iyunun 16-da keçirilməsi nəzərdə tutulsa da, onun öz xahişi ilə oktyabrın 17-də reallaşıb.

Səbinə Zöhrabqızı
Ramal Gülməmmədov

 

Muz-Tv.az