Ani Lorak kobud obrazda...

Türkiyəli müğənni Özcan Deniz yeni filmini sevənlərinin ixtiyarına verməyə hazırlaşır.  

     Türkiyəli müğənni Özcan Deniz yeni filmini sevənlərinin ixtiyarına verməyə hazırlaşır. Bir çox çətinliklərdən keçən iki insanın sevgi macərasından, keşməkeşli həyat yolundan bəhs edən bu ekran əsərinin noyabrda nümayiş ediləcəyi gözlənilir. Baş rolları Özcan Dənizlə keçmiş sevgilisi aktrisa Fahriye Evcenin ifa etdiyi filmdə cütlüyün oxuduğu türkü tamaşaçıların diqqətini cəlb edib.
     Ukraynalı müğənni Ani Lorak yeni klipinin çəkilişlərini tamamlayıb. Ulduzun rəsmi saytında verilən məlumata görə, bu mahnı onun gələcək albomunun üçüncü sinqlıdır. Trekin müəllifi Erkeş Şakeyevdir. Yevgeniy Timoxinin çəkdiyi video çarxda Ani yeni ampluada çıxış edəcək. Belə ki, tamaşaçılar bu dəfə onu bir az kobud, dəcəl, amazonka, kraliça obrazlarında görə biləcək. Klipin nə vaxt təqdim ediləcəyi barədə isə hələ məlumat verilmir.
    İngiltərənin paytaxtı Londonda reallaşan “Bond” filminin dünya premyerasında aktyor Deniel Kreyqin halı pisləşib. Solğun görünən və ayaq üstə durmaqda çətinlik çəkən ulduzun köməyinə meneceri ilə həyat yoldaşı Reyçıl Vayz gəlib. Xatırladaq ki, 44 yaşlı məşhur sözügedən filmdə aldığı rol üçün yaşlı olduğu mövzusunda çox tənqid edilib. Kreyq isə deyilənlərə: “Bəli, yaşlıyam. Hətta 4 ay sonra 45 yaşım tamam olacaq”,- sözləri ilə cavab verib. 
    Rusiyalı müğənni Dmitriy Malikov yeni albomunu çıxarmağa hazırlaşır. Musiqi toplusu “Pianomania” layihəsi çərçivəsində işıq üzü görəcək. Məlumata görə, alboma daxil edilən mahnılar birlikdə kiçik şeir əmələ gətirir. Bu da dinləyicini əsərlərə sona qədər qulaq asmağa vadar edir. Qeyd edək ki, Malikov yeni yaradıcılıq məhsulu üzərində bir ildən çoxdur işləyir.

 

Sahilə Aslanova

 

Muz-Tv.az