Mələkxanım Əyyubova solo konsert verdi

Xalq artisti Mələkxanım Əyyubova Heydər Əliyev sarayında “Göydən enmiş bir Mələk” adlı solo konsert verib.  

    Xalq artisti Mələkxanım Əyyubova Heydər Əliyev sarayında “Göydən enmiş bir Mələk” adlı solo konsert verib. Tədbirdə tamaşaçılara ilk olaraq xanəndənin yaradıcılığından bəhs edən video çarx təqdim edilib. Aparıcılıq missiyasını yerinə yetirənlər isə Zabir Əliyev, Günay Firidunqızı və Murad Əzimzadə olub.
    Xanəndəni Əhməd Bakıxanov adına xalq çalğı alətləri ansamblı və xalq artistləri tarzən Möhlət Müslümov və kamança ifaçısı Fəxrəddin Dadaşovun iştirakıyla muğam üçlüyü müşayiət edib. Mələk xanım konsertdə muğamlarla yanaşı, xalq və bəstəkar mahnıları səsləndirib.
    Fasilə zamanı öz fikirlərini media ilə paylaşan xanəndə bildirib ki, konsert onun eyniadlı mahnısı ilə bağlıdır. İlk dəfədir Heydər Əliyev sarayında konsert proqramı ilə çıxış edən xalq artisti bunun heç də asan bir iş olmadığını bildirib.
     Mələk xanımın ifası zamanı şeir söyləyən İlham Əsgərov da gecəyə xüsusi rəng qatıb.

 

Səbinə zöhrabqızı 
Vüsal Babayev

 

Muz-Tv.az