“Avroviziya-2012”-nin iştirakçısı Bakıda “Sarı gəlin” adlı konsert verəcək

“Avroviziya – 2012” mahnı müsabiqəsində Latviyanı təmsil edən müğənni Anmari noyabrın 27-də Heydər Əliyev sarayında konsert verməyə hazırlaşır. 

   “Avroviziya – 2012” mahnı müsabiqəsində Latviyanı təmsil edən müğənni Anmari noyabrın 27-də Heydər Əliyev sarayında konsert verməyə hazırlaşır. Tədbir Azərbaycanın xalq mahnısı olan “Sarı gəlin”in adını daşıyacaq. İfaçı müsabiqə zamanı müxtəlif tədbirlərdə məhz bu mahnını oxuyaraq azərbaycanlıların rəğbətini qazanıb. 
   Məşhur müğənni İlhamə Qasımova hesab edir ki, hər azərbaycanlı ifaçı ölkədən kənarda şöhrət qazana bilər. bunun üçün sadəcə müəyyən maddi imkan olmalıdır. Onun sözlərinə əsasən, repertuarında toy mahnıları olmadığına görə, Azərbaycanda onu başa düşməyiblər. İlhamə yerli müğənnilərə toylara pul tökmək əvəzinə xaricdə hər hansı bir prodüser mərkəzi ilə müqavilə bağlamağı məsləhət görüb. 
   Namiq Qaraçuxurlu fanatlarının istəklərini yerinə yetirməyə hazırlaşır. Meyxanaçı bildirib ki, artıq bir neçə ildir fanatlar ondan "Sevgi himni" yazmasını tələb edirlər. "Mahnı yaxın günlərdə hazır olacaq. Ümid edirəm ki, bu əsər gənclər üçün doğrudan da sevgi himninə çevriləcək", -deyə o, əlavə edib.
    Müğənni Əli Mirəliyev onu qalmaqal yaradan ifaçı kimi təqdim edən həmkarlarına cavab verib. O, yaradıcılıq baxımından bir çox şou-biznes əhlindən üstün olduğunu da xüsusilə diqqətə çatdırıb: “Bəzi dırnaqarası həmkarlarım mənə qalmaqal yaradan müğənni deyirlər. Ancaq bilmirlər ki, mənim səsyazmalarım qızıl fondda saxlanılır. Onu da deyim ki, teleaparıcılar verilişdə məni xalqın sevimli sənətkarı kimi təqdim edirlər. Bu ad da mənə kifayət edir”, - deyə müğənni etirazını ifadə edib.

 

Sahilə Aslanova

 

Muz-Tv.az