Mədəniyyət və şou aləmində ən son baş verənlər

Noyabrın 15-dən 18-nə kimi Qırğızıstanda Beynəlxalq opera və balet sənəti festivalı keçiriləcək.  

    Noyabrın 15-dən 18-nə kimi Qırğızıstanda Beynəlxalq opera və balet sənəti festivalı keçiriləcək. Tədbir Qırğızıstan Opera və Balet Teatrının yaranmasının 70 illiyinə həsr olunub. Festival Rusiya, Qazaxıstan və Azərbaycanın qabaqcıl teatrlarının solistləri iştirak edəcək. Azərbaycan Dövlət Akademik Opera və Balet Teatrının rəhbərliyi festivalda iştirak etmək üçün teatrın balet truppasının aparıcı solistlərinin namizədliyini irəli sürüb. Noyabrın 18-də Bişkekdə keçiriləcək Qala-konsertdə azərbaycanlı balet ustaları Adolf Adanın “Jizel” və Rimski-Korsakiovun “Şəhrizad” baletlərindən parçalar ifa edəcək. Festivalın əsas təşkilatçıları və sponsorlarından biri “TÜRKSOY” Beynəlxalq təşkilatıdır. 
   Bu gün məşhur tarzən Əhsən Dadaşovun 88 yaşı tamam olur. Sənətkar 1924-cü il sentyabrın 4-də Bakı şəhərində dünyaya göz açıb. O, 1940-cı ildə Səid Rüstəmovun rəhbərlik etdiyi xalq çalğı alətləri orkestrinə qəbul edilib. Əhsən Dadaşov tar ifaçılığı sənətində muğam üzrə müəllimləri olmuş Mirzə Mənsur Mənsurov, Ənvər Mənsurovdan klassik muğam ifaçılıqlarının xüsusiyyətlərini dərindən mənimsəyərək onu inkişaf etdirib. Onun "Rast", "Orta Mahur", "Şur", "Zabul-Segah", "Hümayun", "Vilayəti - Dilkeş", "Çahargah", "Bayatı - Şiraz" və sairə muğamları Azərbaycan radio verilişləri şirkətinin qızıl fondunu təşkil edir.
   Müğənni Eldar Qasımov Ukraynaya gedib. Onun bu səfərinin məqsədi bu yaxınlarda təqdim etdiyi “I’m free” sinqlının tanıtımıdır. Hazırda Kiyevdə olan Eldar səfər çərçivəsində müxtəlif televiziyalarda qonaq olacaq və adıçəkilən mahnını ifa edəcək. Eyni zamanda Ukraynadakı pərəstişkarları ilə görüşməyə hazırlaşan ifaçı bir sıra təkliflər aldığını və bu təklifləri dəyərləndirəcəyini bildirib. Eldar Qasımov daha bir neçə Avropa ölkəsinə eyni məqsədli səfərlər etməyi planlaşdırır. 
   Keçmiş “NEXT” qrupunun solisti Seyran Babayev söz və musiqisi Hüseyn Cavadzadəyə məxsus "Söhbət sevgidən gedir" mahnısını dinləyicilərinə təqdim edib. Eyni zamanda yeni klipini də təhvil verməyə hazırlaşan müğənni hazırda Türkiyədə albom üzərində çalışır. Bundan başqa, ifaçının mətbuat xidmətindən verilən məlumata görə, Seyran ailə qurmağa hazırlaşır. Qeyd edək ki, gənc mügənninin seçimi Rusiya vətəndaşı Viktoriya Kovalçukdur. Onların arasında 14 il yaş fərqi olmasına isə 25 yaşlı Seyran heç bir əhəmiyyət vermədiyini bildirib.

 

Sahilə Aslanova

 

Muz-Tv.az